ەلىمىزدە ۋەفا ستاندارتى بويىنشا سالىنعان ءۇشىنشى ستاديون اشىلدى. بۇل تۋرالى تۋريزم جانە سپورت مينيسترلىگى جاريالادى، دەپ حابارلايدى "ادىرنا".
قىزىلوردادا سالىنعان كوپسالالى ستاديون 11 مىڭ ورىنعا لايىقتالعان. سپورت نىسانىنىڭ جالپى اۋماعى 20 مىڭ شارشى مەتردەن اسادى. كەشەندە بوكس، كۇرەس، سپورتتىق گيمناستيكا، تاەكۆوندو، اۋىر اتلەتيكاعا ارنالعان زالدار بار. ەرەكشە قاجەتتىلىگى بار جاندار ءۇشىن دە قولايلى جاعداي قاراستىرىلعان.
«بيىل جىل باسىنان بەرى ەلىمىزدىڭ 14 وڭىرىندە 32 سپورت نىسانى پايدالانۋعا بەرىلدى. جىل سوڭىنا دەيىن تاعى 70 نىساننىڭ قۇرىلىسى اياقتالادى. «قايسار ارەنا» ستاديونى – قاسىم-جومارت توقاەۆتىڭ تاپسىرماسىمەن جۇزەگە اسقان ەڭ ءىرى ينفراقۇرىلىمدىق جوبالاردىڭ ءبىرى»، – دەدى مينيستر ەربول مىرزابوسىنوۆ.
ستاديون ۋەفا-نىڭ 4-ساناتىنا تولىق سايكەس كەلەدى. فۋتبول الاڭى زاماناۋي جاساندى كوگالمەن جابدىقتالىپ، جارىقتاندىرۋ جۇيەسى دە ۋەفا تالاپتارىنا ساي جاسالعان.
