قۇرلىق اسكەرلەرىنىڭ باس قولباسشىسى باسقارماسى ماڭعىستاۋ وبلىسىنداعى ساربازدىڭ اناسى كوتەرگەن شاعىمعا تۇسىنىكتەمە بەردى، دەپ حابارلايدى “ادىرنا” ۇلتتىق پورتالى.
ايەل بالاسىنىڭ اسكەردە الىمجەتتىك كورگەنىن ايتىپ، كەيىن ونىڭ پسيحياتريالىق كلينيكاعا جاتقىزىلعانىن حابارلاپ، دابىل قاققان.
كوكتەمدە اسكەرگە شاقىرىلعان 18 جاستاعى ازاماتقا قىركۇيەك ايىنىڭ سوڭىندا “بۇيرەك پەن جۇرەك اۋرۋلارىنا بايلانىستى ماماندارعا قارالۋ قاجەت” دەپ ايتىلعان. كەيىننەن ونىڭ ورنىنا پسيحياتريالىق كلينيكاعا جاتقىزىلعانى بەلگىلى بولدى. كلينيكا قىزمەتكەرلەرى ساربازدىڭ “سۋيتسيدتىك ويلارىنا بايلانىستى” تۇسكەنىن مالىمدەگەن.
كەيىن اناسى بالاسىنىڭ فيزيكالىق زورلىق قانا ەمەس، جىنىستىق زورلىق-زومبىلىققا دا ۇشىراعانىن ايتقان.
قورعانىس مينيسترلىگىنىڭ قۇرلىق اسكەرلەرى باسقارماسى حابارلاعانداي، ساربازدىڭ اناسى تۇسىرگەن بەينەۇندەۋ نەگىزىندە ىشكى ىستەر مينيسترلىگىنىڭ باتىس ءوڭىرى بويىنشا اسكەري-تەرگەۋ باسقارماسى قىلمىستىق ءىس قوزعاعان. سونىمەن قاتار ارنايى وفيتسەرلەردەن قۇرالعان جۇمىس توبى قۇرىلىپ، قىزمەتتىك تەكسەرىس باستالدى.
تەكسەرۋ بارىسىندا فيزيكالىق نەمەسە جىنىستىق زورلىق فاكتىلەرى راستالماعان.
«كۋاگەرلەردىڭ ايعاقتارى بويىنشا ساربازعا قاتىستى زورلىق-زومبىلىق ارەكەتتەرى انىقتالمادى. ۆيدەوباقىلاۋ كامەرالارىنىڭ جازبالارى زەرتتەلىپ، اسكەري ءتارتىپ بۇزۋشىلىق دەرەكتەرى تىركەلگەن جوق»، – دەلىنگەن رەسمي جاۋاپتا.
باسقارما وكىلدەرى ساربازدىڭ ءوز ايعاقتارى بىرنەشە رەت وزگەرگەنىن جانە ايتقان نۇسقالارى ءبىر-بىرىنە قايشى كەلگەنىن اتاپ ءوتتى.
قازىر سارباز اقتاۋداعى اسكەري-تەرگەۋ باسقارماسىندا. تەرگەۋ شارالارى اياقتالعان سوڭ ونى استاناعا، قورعانىس مينيسترلىگىنىڭ باس گوسپيتالىنە جىبەرۋ جوسپارلانىپ وتىر. وندا ونىڭ اسكەري قىزمەتتى جالعاستىرۋعا جارامدىلىعى انىقتالادى.
پسيحونەۆرولوگيالىق ديسپانسەر ماماندارىنىڭ قورىتىندىسىنا سايكەس، ساربازدا پسيحولوگيالىق تۇراقسىزدىق بار.
«پسيحولوگيالىق زەرتتەۋ ناتيجەسىندە ونىڭ بەيىمدەلۋ دەڭگەيى تومەن، مورالدىق تۇراقتىلىعى ءالسىز ەكەنى انىقتالدى. اسكەردە جۇرگەن كەزىندە دە تۇيىقتىق، ەنجارلىق، دەپرەسسيالىق بەلگىلەر بايقالعان. بۇعان دەيىن ءوز-وزىنە زيان كەلتىرۋگە تالپىنىس جاساعان»، – دەلىنگەن باسقارما مالىمەتىندە.
قورعانىس مينيسترلىگى بالانى “اسكەرگە جارامدى” دەگەن شەشىمگە تۇسىنىكتەمە بەردى.
«مەديتسينالىق كوميسسيا قۇرامىنا ازاماتتىق مەديتسينا سالاسىنىڭ ماماندارى ەنەدى. ولار قورعانىس مينيسترلىگىنە ەمەس، جەرگىلىكتى اتقارۋشى ورگاندارعا باعىنادى. كوميسسيا قۇرامىن وبلىس پەن قالالار اكىمدەرىنىڭ ورىنباسارلارى تاعايىندايدى»، – دەپ حابارلادى.
