2025 جىلعى 6–17 قازان ارالىعىندا پولشانىڭ ۆارشاۆا قالاسىندا ەقىۇ دەموكراتيالىق ينستيتۋتتار جانە ادام قۇقىقتارى بيۋروسىنىڭ ادام ولشەمى جونىندەگى كونفەرەنتسياسى ءوتىپ جاتىر.
ءىس-شارا اياسىندا ادام قۇقىقتارى سالاسىنداعى زاڭنامانى رەفورمالاۋ بويىنشا ىلگەرىلەۋ ماسەلەلەرى تالقىلانۋدا. تۇرمىستىق زورلىق-زومبىلىقتىڭ الدىن الۋ جونىندەگى جۇيەلى شارالار تۋرالى باياندامالار ۇسىنىلدى.
2024 جىلعى 15 ساۋىردە قازاقستان رەسپۋبليكاسىنىڭ «ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» №72-VIII زاڭى قابىلداندى. بۇل زاڭدا وتباسىنى قولداۋ ورتالىقتارىنىڭ فۋنكتسيالارى بەكىتىلگەن.
زاڭ كۇشىنە ەنگەننەن كەيىن مۇنداي ورتالىقتاردىڭ سانىنىڭ وسۋىندە وڭ ديناميكا بايقالادى.
ماسەلەن، وتكەن جىلدىڭ ماۋسىمىنان بيىلعى ماۋسىمعا دەيىن كوممۋنالدىق مەملەكەتتىك مەكەمە رەتىندە اشىلعان ورتالىقتاردىڭ سانى 33-تەن 131-گە دەيىن ارتقان.
2025–2027 جىلدارى ولاردىڭ سانىن 208-گە دەيىن جەتكىزۋ جوسپارلانىپ وتىر.
اتالعان تاقىرىپ بويىنشا بايانداماشى – ۇلتتىق كاسىبي الەۋمەتتىك قىزمەتكەرلەر اليانسىنىڭ اتقارۋشى ديرەكتورى دينارا ەسىموۆا بىلاي دەدى:
«قازاقستانداعى تۇرمىستىق زورلىق-زومبىلىقتىڭ اۋقىمى، تۇرلەرى مەن فاكتورلارىن تالداۋ ينستيتۋتسيونالدىق ىلگەرىلەۋدى، قوعامدىق وزگەرىستەردى جانە وسى سالاداعى مەملەكەتتىك ساياسات شارالارىنىڭ دامۋىن كورسەتەتىن بىرقاتار وڭ ۇردىستەردى ايقىندايدى.
2024 جىلى بىرقاتار اكىمشىلىك قۇقىق بۇزۋشىلىقتار (سونىڭ ىشىندە ۇرىپ-سوعۋ جانە جەڭىل دارەجەدە دەنە جاراقاتىن سالۋ) قىلمىستىق ساناتقا اۋىستىرىلعان زاڭنامالىق رەفورما جۇرگىزىلدى. ناتيجەسىندە قۇقىق بۇزۋشىلىقتاردى انىقتاۋ دەڭگەيى ارتتى.
ۇلتتىق بايانداما ناتيجەسىندە الىنعان سوتسيولوگيالىق دەرەكتەر حالىقتىڭ جوعارى حاباردارلىعىن كورسەتەدى: ساۋالناماعا قاتىسۋشىلاردىڭ 59,3%-ى زاڭنىڭ قابىلدانعانىن بىلەدى. بۇل قوعامنىڭ وسى ماسەلەگە ءوسىپ كەلە جاتقان نازارىن جانە قورعاۋ شارالارىنا جۇگىنۋ دەڭگەيىنىڭ ارتۋىن دالەلدەيدى».
