تۇركىستان قالاسى اكىمىنىڭ ورىنباسارى ابىلسەيىت راباەۆ شاھار اۋماعىندا جۇزەگە اسىرىلىپ جاتقان قۇرىلىس جانە جول جوندەۋ نىساندارىن ارالاپ، اتقارىلىپ جاتقان جۇمىستاردىڭ بارىسىمەن تانىستى.
ابىلسەيىت بايسەيىتۇلى جاڭادان سالىنىپ جاتقان يپپودرومعا اپاراتىن جولدىڭ قۇرىلىس بارىسىن ارالادى. جوسپارعا سايكەس ۇزىندىعى 1,3 شاقىرىمدى قۇرايتىن جولعا ەكى قاباتتى اسفالت توسەلىپ، جارىق شامدارى ورناتىلعان. بۇگىندە جولدىڭ ەكى جاعىنان اياقجول توسەۋ جۇمىستارى جالعاسۋدا.
سونداي-اق، بەكزات تۇرعىن الابىندا اتقارىلىپ جاتقان جۇمىس بارىسىمەن تانىستى. مۇندا جالپى ۇزىندىعى 8,4 شاقىرىمدى قۇرايتىن 5 كوشەدە ورتاشا جوندەۋ جۇمىستارى جۇرگىزىلۋدە. جوندەۋ بارىسىندا جول نەگىزىن ازىرلەۋ، ءىرى جانە ۇساق تۇيىرشىكتى اسفالت جابىندىسىن توسەۋ، جول جيەكتەرىن رەتكە كەلتىرۋ، سونداي-اق ءبىر جاقتى اياقجول سالۋ جۇمىستارى اتقارىلۋدا.
وتىرار تۇرعىن الابىندا دا اۋقىمدى جوندەۋ جۇمىستارى قولعا الىنعان. مۇندا شايان، ويسىلقارا، كەلەس جانە ولارعا ىرگەلەس كوشەلەردى قامتيتىن، جالپى ۇزىندىعى 24,6 شاقىرىمدى قۇرايتىن 28 كوشەدە ورتاشا جوندەۋ جۇرگىزىلۋدە.
جول ينفراقۇرىلىسىمەن قاتار تۇرعىن ءۇي قۇرىلىسى دا قارقىن الىپ كەلەدى. ابىلسەيىت بايسەيىتۇلى 5 قاباتتى 22 كرەديتتىك تۇرعىن ءۇي كەشەنىنىڭ قۇرىلىس الاڭىندا بولىپ، مەردىگەر مەكەمە وكىلدەرىمەن كەزدەستى. جالپى اۋماعى 8,4 گەكتاردى قۇرايتىن كەشەندە 880 پاتەر سالىنىپ جاتىر. قازىرگى تاڭدا نەگىزگى قۇرىلىس جۇمىستارى باستالىپ، بەلسەندى جۇرگىزىلۋدە.
نىسانداردى ارالاۋ بارىسىندا قالا اكىمىنىڭ ورىنباسارى مەردىگەر ۇيىمدارعا جۇمىستاردى ساپالى، ءارى بەلگىلەنگەن مەرزىمدە اياقتاۋدى تاپسىردى.
ۇقساس جاڭالىقتار
