جىل سايىن 19 قازاندا قۇتقارۋشىلار كۇنى اتالىپ وتەدى. بۇل كۇن – تابيعي جانە تەحنوگەندىك اپاتتاردىڭ الدىن الۋ مەن سالدارىن جويۋ باعىتىندا قاجىرلى ەڭبەك ەتىپ جۇرگەن ازاماتتىق قورعاۋ سالاسىنىڭ قىزمەتكەرلەرىنە، ياعني قۇتقارۋشىلارعا ارنالاتىن كاسىبي مەرەكە.
قازاقستان رەسپۋبليكاسى ۇكىمەتىنىڭ 1995 جىلعى 19 قازانداعى قاۋلىسىمەن ەلىمىزدە توتەنشە جاعدايلار جونىندەگى مەملەكەتتىك كوميتەت قۇرىلعان بولاتىن. سول كۇننەن باستاپ ەلىمىزدە ازاماتتىق قورعاۋ جۇيەسى قالىپتاسىپ، ءتۇرلى توتەنشە جاعدايلاردا جەدەل ارەكەت ەتەتىن ارنايى قۇرىلىمدار جۇيەلى تۇردە جۇمىس ىستەي باستادى. 2008 جىلدان باستاپ بۇل كۇن رەسمي تۇردە قۇتقارۋشىلار كۇنى رەتىندە اتاپ وتىلەدى.
قۇتقارۋشىلار – بۇل تەك ءورت سوندىرۋشىلەر عانا ەمەس، ولار – سۋ تاسقىنىندا، جەر سىلكىنىسىندە، جول اپاتىندا، وندىرىستىك اپاتتاردا، ورمان ءورتى مەن ءتۇرلى تابيعي اپاتتاردا الدىڭعى شەپتە جۇرەتىن ماماندار. ولار ادام ءومىرىن ساقتاپ قالۋ ءۇشىن كۇن سايىن قاۋىپ-قاتەرمەن بەتپە-بەت كەلەدى. بۇل – جوعارى كاسىبيلىكپەن قاتار، ۇلكەن رۋحاني جاۋاپكەرشىلىك پەن ەرلىك تالاپ ەتەتىن ماماندىق.
قۇتقارۋشىلاردىڭ ەڭبەگى – قوعامنىڭ تىنىشتىعى مەن قاۋىپسىزدىگىنە باعىتتالعان. ولاردىڭ جىلدام ارەكەتى مەن كاسىبي دايىندىق دەڭگەيى – كوپتەگەن ادامنىڭ ءومىرىن ساقتاپ قالۋعا سەبەپ بولىپ جاتادى. وسى ورايدا قۇتقارۋ قىزمەتىنىڭ دامۋىنا جانە ماتەريالدىق-تەحنيكالىق بازاسىنىڭ جاڭارۋىنا مەملەكەت تاراپىنان ەرەكشە كوڭىل ءبولىنىپ كەلەدى.
