قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ جيەنى، تيمۋر مەن دينارا قۇلىباەۆتاردىڭ ۇلى التاي اسقار كيپر ازاماتتىعىن العانى انىقتالدى. تەرگەۋ دەرەكتەرىنە سايكەس، ول بۇل ازاماتتىقتى كيپردىڭ ينۆەستيتسيالىق باعدارلاماسى ارقىلى 2019 جىلى شامامەن 1 ميلليارد تەڭگەگە الىپ، "التىن پاسپورت" يەلەنگەن، دەپ حابارلايدى “ادىرنا” ۇلتتىق پورتالى Stan.kz اقپارات اگەنتتىگىنە سىلتەپ.
كيپر ۇكىمەتىنىڭ رەسمي باسىلىمىندا التاي اسقاردىڭ ازاماتتىق الۋ ءۇشىن ءوتىنىش بەرگەنى جاريالانعان. باعدارلاما سول ۋاقىتتا الەمنىڭ ءارتۇرلى ەلدەرىنەن كەلگەن باي ادامدارعا مۇمكىندىك بەردى، ونىڭ ىشىندە ىزدەۋدە بولعان تۇلعالار دا بار. Al Jazeera تەلەارناسى جۇرگىزگەن تەرگەۋ ناتيجەسىندە، ەۋرووداق بيلىگى بۇل جاعدايعا الاڭداپ، 2020 جىلدىڭ قاراشاسىندا كيپر "التىن پاسپورتتار" باعدارلاماسىن جاپتى.
باعدارلاما بويىنشا ازاماتتىق الۋ ءۇشىن نەگىزگى ءوتىنىش بەرۋشى كەمىندە 2,5 ميلليون ەۋرو ينۆەستيتسيا سالۋى كەرەك بولعان. سول 2019 جىلعى باعام بويىنشا بۇل شامامەن 1,07 ميلليارد تەڭگەگە تەڭ. وسىلايشا، التاي اسقار قازاقستان زاڭناماسىنا قايشى ەكىنشى ازاماتتىققا يە بولعان.
قازىر كيپر بيلىگى زاڭسىز الىنعان ازاماتتىقتاردى كەرى قايتارۋ پروتسەسىن جۇرگىزىپ جاتىر. ولاردىڭ قاتارىندا قازاقستاننان باسقا دا بەلگىلى تۇلعالار بار، مىسالى، Kazakhstan Kagazy كومپانياسىنىڭ بۇرىنعى باس ديرەكتورى ماقسات ءارىپ تە بار. ونى 2024 جىلدىڭ ناۋرىز ايىندا ءباا-دە قازاقستان ءىىم ينتەرپول ۇلتتىق بيۋروسىنىڭ سۇراۋى بويىنشا ۇستاعان.
سونداي-اق، كيپر ازاماتتىعىنان ايىرىلعاندار اراسىندا رەسەيلىك وليگارحتار ولەگ دەريپاسكا، الەكسەي كۋزميچەۆ، ميحايل گۋتسەريەۆ، ۆاديم موشكوۆيچ، سونداي-اق وزبەكستاندىق ميللياردەر اليشەر ۋسمانوۆتىڭ اپكەسى گۇلباحور يسمايلوۆا جانە ۋكراينالىق كاسىپكەر يگور كولومويسكي بار.
سونىمەن قاتار، جاقىندا 35 جاسقا تولاتىن التاي اسقاردىڭ شۆەيتساريا رەزيدەنتتىك كارتاسى بار. ول وسى ەلدى تۇرعىلىقتى جەرى رەتىندە كورسەتىپ، اكەسى تيمۋر قۇلىباەۆتىڭ سەرىكتەسى باحاريدين ابلازيموۆپەن بىرگە امەريكالىق ORBI ستارتاپىنا ينۆەستيتسيا سالعان. قۇلىباەۆتار شۆەيتسارياداعى Bellerive قامالىنىڭ يەسى، جانە وسى مۇلىكتىڭ ساتىپ الىنۋ تاريحىنا قاتىستى جەنەۆا پروكۋراتۋراسى 2024 جىلى تەرگەۋ باستاعان.
شەتەلدەگى جىلجىمايتىن مۇلىككە كەلەتىن بولساق، ماسكەۋدە التاي اسقاردىڭ "مەركۋري" مۇناراسىندا 114,5 م² پاتەرى بار. ونىڭ باعاسى نارىقتاعى ورتاشا باعامەن شامامەن 400 ميلليون تەڭگە. دۋبايداعى Palm Jumeirah ارالىنداعى Marina Residences تۇرعىن كەشەنىندە ورنالاسقان 633 م² پاتەرىنىڭ باعاسى شامامەن 2 ميلليارد تەڭگە دەپ باعالانعان.
