2025 جىلعى 5 قاراشا كۇنى اقتاۋ قالاسىندا ەرەكشە ءبىلىم بەرۋ قاجەتتىلىكتەرى بار بالالارعا ارنالعان بىرەگەي مەديتسينالىق جوبانىڭ قورىتىندىسىنا ارنالعان ءباسپاسوز كونفەرەنتسياسى ءوتتى. اۋقىمدى قايىرىمدىلىق جوبانىڭ ناتيجەسىندە 150-دەن استام بالاعا 153 يننوۆاتسيالىق وپەراتسيا جاسالىپ، جاڭا ومىرگە قادام باستى.
جوبا BI Group قۇرىلىس كومپانياسى مەن ماڭعىستاۋ وبلىستىق دەنساۋلىق ساقتاۋ باسقارماسىنىڭ قولداۋىمەن «BI-جۇلدىزاي» كورپوراتيۆتىك قورىنىڭ باستاماسىمەن جۇزەگە اسىرىلدى. بارلىق وتالار ماڭعىستاۋ وبلىستىق كوپبەيىندى بالالار اۋرۋحاناسىندا "مۇمكىندىك" باعدارلاماسى اياسىندا وتكىزىلدى.
شەتەلدىك جەتەكشى دارىگەرلەر ەرەكشە بالالاردىڭ موتورلىق فۋنكتسيالارىن قالپىنا كەلتىرۋ جانە ءومىر ءسۇرۋ ساپاسىن ارتتىرۋ ماقساتىندا كۇردەلى وتا تۇرلەرىن تەگىن تۇردە جۇرگىزدى. حيرۋرگيالىق ەمدەۋ الەمنىڭ جەتەكشى كلينيكالارىندا قولدانىلاتىن، وڭىردە بالاماسى جوق وزىق ادىستەرمەن شەتەلدىك ماماندار جۇرگىزدى. وتادان كەيىن بالالار وڭالتۋ جانە فيزيوتەراپيا كۋرستارىن دەنساۋلىق ساقتاۋ سالاسىنا جاۋاپتى باسقارمانىڭ قولداۋىمەن جالعاستىرۋدا.
ايتا كەتەيىك، حيرۋرگيالىق ەمدەۋدەن بولەك، 365 بالا پروفەسسورلاردان كەڭەس الدى، ال 110 قازاقستاندىق مامان قورمەن بىرلەسىپ ۇيىمداستىرىلعان 11 ماستەر-كلاستا وقۋدان ءوتتى.
جيىن بارىسىندا 11 وتادان وتكەن 9 جاسار امەليا ەسىمدى ءبۇلدىرشىننىڭ "تۇساۋ كەسەر" ءراسىمى بولدى. بۇل – مەديتسينالىق كومەكتىڭ ناقتى ناتيجەسىن كورسەتەتىن ءارى كوپشىلىكتىڭ كوڭىلىنە ءۇمىت ۇيالاتقان ەرەكشە ءارى اسەرلى ءسات بولدى.
20 جىلدان استام ۋاقىت بويى "BI–جۇلدىزاي" قورى ينكليۋزيا، مەديتسينا، سپورت جانە شىعارماشىلىق سالالارىندا ەرەكشە بالالاردىڭ الەۋەتىن اشۋعا، قوعامعا بەيىمدەلۋىنە ىقپال ەتىپ كەلەدى. «مۇمكىندىك» باعدارلاماسى — قوردىڭ ەڭ ءىرى مەديتسينالىق باستاماسى. جىل سايىن بالالار وسى جوبانىڭ ارقاسىندا تولىققاندى ومىرگە قادام باسۋدا.
بۇل – ءوڭىر مەديتسيناسىنداعى ەرەكشە بالالارعا ارنالعان ءىرى الەۋمەتتىك جانە مەديتسينالىق باستاما. ۇيىمداستىرۋشىلاردىڭ ايتۋىنشا، وسىنداي جوبالار الداعى ۋاقىتتا دا جالعاسىن تاباتىن بولادى.
