اتىراۋ وبلىسىندا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا بۇرىن-سوڭدى مەديتسينالىق ينفراقۇرىلىم جۇرگىزىلمەگەن شالعاي اۋىلدارعا 6 فەلدشەرلىك-اكۋشەرلىك پۋنكت جانە ءبىر دارىگەرلىك امبۋلاتوريا مەن 11 مەديتسينالىق پۋنكت سالۋ جوسپارلانعان،- دەپ حابارلايدى وڭىرلىك كوممۋنيكاتسيالار قىزمەتى.
ولاردىڭ ىشىندە 2023 جىلى قوس مەديتسينالىق پۋنكت جانە ءبىر فاپ پايدالانۋعا بەرىلدى. 2024 جىلدىڭ جەلتوقسانىندا يندەر اۋدانىنىڭ ەسبول اۋىلىنا دارىگەرلىك امبۋلاتوريا، يساتاي اۋدانى جاسقايرات اۋىلىنا جانە قۇرمانعازى اۋدانىنداعى ازعىر، جاستالاپ، باتىربەك، قوڭىرتەرەك، افاناسەۆا اۋىلدارىنا مەديتسينالىق پۋنكت، سونداي-اق كۋدرياشوۆ پەن ارنا اۋىلىنا فاپ سالىندى. قازىر قۇرمانعازى اۋدانىنىڭ جالعىزاپان، جامبىل جانە ءالىپوۆا اۋىلىنداعى نىسانداردى تەڭگەرىمگە بەرۋ جۇمىستارى جۇرگىزىلۋدە.
- ۇلتتىق جوبا اياسىندا جوسپارلانعان 18 نىساننىڭ 15-ءى تولىق اياقتالدى. قالعان ء ۇش نىساندا قۇرىلىس جۇمىستارى جالعاسۋدا. قۇرمانعازى اۋدانىنىڭ كوپتوعاي اۋىلىنداعى فاپ 85% دايىن، ال. قىزىلقوعا اۋدانىنداعى جامانسور جانە جانتەرەك اۋىلدارىنداعى مەديتسينالىق پۋنكتتەردىڭ قۇرىلىسى 50% ورىندالدى، - دەدى وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ باسشىسى نۇربەرگەن قۇساينوۆ.
مۇنىمەن قاتار، دەنساۋلىق ساقتاۋ باسقارماسى اۋىلدارعا مامان تارتۋ بويىنشا كەشەندى شارالاردى قولعا العان. بىلتىر 148, بيىل 31 مامانعا كوتەرمە جاردەماقى بەرىلسە، قازىر تاعى 68 ماماننىڭ قۇجاتى قارالۋدا.
بۇدان بولەك، اۋىلدارداعى كادر تاپشىلىعىن شەشۋ ماقساتىندا دارىگەرلەردىڭ باسپانا ماسەلەسىنە دە قولداۋ كورسەتىلىپ كەلەدى. 2022 جىلدان بەرى «وتباسى بانك» ارقىلى 5% جەڭىلدەتىلگەن يپوتەكا باعدارلاماسىمەن 43 دارىگەر باسپانالى بولعان.
ال بيىل جەرگىلىكتى بيۋدجەت ەسەبىنەن مەديتسينالىق ءبىلىم گرانتتارى كەڭەيتىلىپ، 83 ستۋدەنت باكالاۆرياتقا، 27 مامان رەزيدەنتۋراعا قابىلداندى.
اتىراۋدا جاسوسپىرىمدەر قاۋىپسىزدىگىن كۇشەيتۋ ماقساتىندا پوليتسيا مەن اكەلەر بىرلەسكەن پاترۋلگە شىقتى
