ناۋرىزنامانىڭ جەتىنشى كۇنىندە اتىراۋدا ۇلتتىق سپورت كۇنى تويلاندى. اتالعان مەرەكەگە وراي دەنە شىنىقتىرۋ، سپورت جانە تۋريزم باسقارماسىنىڭ ۇيىمداستىرۋىمەن ۇلتتىق سپورت تۇرلەرىنەن جارىس ءوتتى. حالقىمىزدىڭ مادەني مۇراسىن جاڭعىرتىپ، سالاۋاتتى ءومىر سالتىن ناسيحاتتاۋعا باعىتتالعان ماڭىزدى مەرەكە يساتاي-ماحامبەت الاڭىندا تويلاندى،- دەپ حابارلايدى وڭىرلىك كوممۋنيكاتسيالار قىزمەتى.
تارتىستى دودادا قازاق كۇرەسى، اسىق اتۋ، ارقان تارتىس، لاڭگى تەبۋ، قوي كوتەرۋ جانە «تولاعاي الىپتار» سايىستارى ۇيىمداستىرىلدى. وندا 500-گە جۋىق كاسىبي جانە اۋەسقوي سپورتشى باق سىناپ، ءوزارا شىن مىقتىنى انىقتادى. جۇلدەگەرلەرگە قوماقتى سىي-سىياپاتتار دايىندالعان. جالپى الاڭعا 3000-عا تارتا تۇرعىن جينالىپ، جەرگىلىكتى ونەرپازدار ءان شىرقاپ، مەرەكە كوركىن قىزدىرا ءتۇستى.
سونداي-اق قولونەر شەبەرلەرىنىڭ دايىنداعان ۇلتتىق ناقىشتاعى بۇيىمدارى كورمەگە قويىلىپ، كەلۋشىلەر نازارىنا ۇسىنىلدى.
وبلىستىق دەنە شىنىقتىرۋ، سپورت جانە تۋريزم باسقارماسىنىڭ ءبولىم باسشىسى امانجول ساعىنعاليەۆتىڭ ايتۋىنشا، مۇنداي ءىس-شارا جىل سايىن وڭىردە جوعارى دارەجەدە وتەدى. 
- مۇنداي ءىس-شارالار ارقىلى ءبىز ءداستۇرىمىزدى جاڭعىرتىپ، جاس ۇرپاققا ناسيحاتتايمىز. الداعى ۋاقىتتا دا بۇل باعىتتاعى جۇمىستار جالعاسىن تابادى، – دەدى ول.
الاڭدا التى سپورت تۇرىنە جاستار بەلسەنە قاتىسىپ، وزدەرىنىڭ ەپتىلىگى مەن شەبەرلىكتەرىن كورسەتتى.
- بۇگىنگى سايىسقا ارنايى كەلدىم. ۇلتتىق سپورت تۇرلەرىنىڭ بارىنە قاتىسىپ، بەلسەندى بولۋ جىل سايىنعى ماقساتىم. قولدان كەلگەنشە جەڭىستى قانجىعاما بايلاۋعا تىرىسامىن. وزگە جاستاردى دا بەلسەندى اتسالىسۋعا شاقىرامىن، - دەدى قاتىسۋشى ايدار جوبالوۆ.
سونىمەن قاتار وبلىسقا قاراستى 7 اۋداندا دا ۇلتتىق سپورت تۇرلەرىنەن 161 بۇقارالىق ءىس-شارالار ۇيىمداستىرىلدى.
