اتىراۋلىق ەكى جىگىت ءتۇن ورتاسىندا توبەلەس شىعارعان

جانجال 30 جەلتوقساندا ساعات 00:50 شاماسىندا بولعان. «تەز تاعام دايىندايتىن ءدامحانانىڭ بىرىندە 1996 جانە 1999 جىلعى ەكى جىگىت جانجالداسقان. ءوزارا سوزگە كەلىسپەگەن ولار كوشەگە شىعىپ، جول بويىندا توبەلەسكەن. پاترۋلدىك پوليتسيا باتالونىنىڭ قىزمەتكەرلەرى جەدەل-ىزدەستىرۋ شاراسىن جۇرگىزىپ، قۇقىق بۇزۋشىلاردى ۇستادى»، - دەپ حابارلادى وبلىستىق پوليتسيا دەپارتامەنتىنىڭ ءباسپاسوز قىزمەتى. جانجالداسقاندار اراسىندا ەشكىم جاراقات الماعان. بىراق ولار قوعامدىق ءتارتىپتى بۇزعانى ءۇشىن قر اكىمشىلىك قۇقىق بۇزۋشىلىق تۋرالى كودەكسىنىڭ 434-بابىمەن اكىمشىلىك قاماۋعا الىندى. جيناقتالعان ءىس قۇجاتتار سوتقا جولدانادى.

«ادىرنا» ۇلتتىق پورتالى