تۇركىستان وبلىسى كەنتاۋ قالاسىنا قاراستى شورناق اۋىلىنداعى توبەلەسكە قاتىستى رەسمي مالىمەت شىقتى.
وقيعا 21 شىلدە كۇنى تۇندە باستالعان. الەۋمەتتىك جەلىدەگى ۆيدەولار قوعامنىڭ اشۋ-ىزاسىن تۋدىرۋدا.
"21.07.2020 جىلى تۇنگى ساعات 01:00 شاماسىندا كەنتاۋ قالالىق پب-ءنىڭ كەزەكشى بولىمىنە جەرگىلىكتى تۇرعىننان، ءوزىن جانە تۋىستارىن اۋىلداستارى ۇرىپ-سوققاندىعى تۋرالى حابارلاما كەلىپ تۇسكەن. بۇل جايت قپب-نە تىركەلدى. وقيعا ورنىنا شۇعىل تۇركىستان وبلىسى پد باسشىلىعى باستاعان جەدەل-تەرگەۋ توبى شىقتى.
پوليتسەيلەر جۇرگىزگەن جەدەل-تەرگەۋ ءىس-شاراسى بارىسىندا انىقتالعانداي، اۋىل كوشەلەرىنىڭ بىرىندە ەر ادام مەن اۋىلداسىنىڭ اراسىندا تۇسىنبەۋشىلىك ورىن العان. ارادا ءبىراز ۋاقىت وتكەن سوڭ، جابىرلەنۋشىنىڭ ۇيىنە بىرنەشە اۆتوكولىكتەرمەن بەلگىسىز تۇلعالار كەلىپ، ونىڭ ءۇيى مەن كورشىلەرىنىڭ اۋلاسىنا قاراي تاس لاقتىرىپ، سودان بەلگىسىز باعىتقا جاسىرىنعان. جابىرلەنۋشىنىڭ 3 تۋىسى جاراقات العان. ولارعا مەديتسينالىق كومەك كورسەتىلدى. وقيعا ورنىنا ءبىرىنشى بولىپ جەتكەن كەنتاۋ قپب-ءنىڭ ۋچاسكەلىك ينسپەكتورى دا جاراقات العان. ۋچاسكەلىك پوليتسيا ينسپەكتورى نۇرلان قۇرالباەۆ تۇرعىنداردىڭ قارۋ قولدانۋىنا جول بەرمەگەن.
جەدەل-ىزدەستىرۋ ءىس-شاراسى ناتيجەسىندە جەدەل ۋاكىلدەر 4 كۇدىكتى تۇلعانى انىقتاپ، ۇستادى. ورىن العان جاعدايدىڭ بارلىعى سوتقا دەيىنگى تەرگەۋ بارىسىندا انىقتالادى، " - دەپ مالىمدەدى تۇركىستان وبلىسىنىڭ پوليتسيا دەپارتامەنتى.
وسى وقيعاعا بايلانىستى جۋرناليست ولجاس مامىر انىقتاعان اقپارات بويىنشا، الماس ەسىمدى جىگىت يفتارحار دەگەن جىگىتتى ماس كۇيىندە توقتاتقان.
ولجاس مامىر، جۋرناليست:
تۇركىستان وبلىسى قوسمەزگىل اۋىلىندا تۇنگى 12 شاماسىندا ۇيىنە قايتىپ كەلە جاتقان يفتيحار ەسىمدى تۇرعىنىنا وسى اۋىلدىڭ الماس ەسىمدى جىگىتى ماس كۇيدە توقتاتىپ، تيىسكەن. ناتيجەسىندە ەكەۋىنىڭ اراسىندا كيكىلجىڭ تۋىپ، يفتيحار ءوز كولىگىنە وتىرىپ، ۇيىنە كەتىپ قالعان. الماس ءوز جولداستارىنا يفتيحار ونى سوققىعا جىقتى دەپ ايتقان. اۋىل جىگىتتەرى جينالىپ، الماستىڭ سوزىنە ەرىپ يفتيحار مەن ونىڭ تۋىستارىنىڭ ۇيىنە تاس لاقتىرىپ، دەنە جاراقاتتارىن سالعان. ماس كۇيدە ۇلت اراسىنا وت سالۋعا بولمايدى. ءىستىڭ انىق كانىعىن ءبىلىپ ارەكەت جاسايىق اعايىن!!!!
"ادىرنا" ۇلتتىق پورتالى
