تۇركىستان وبلىسىندا مادەني ينفراقۇرىلىمدى دامىتۋ باعىتىنداعى جۇمىستار جۇيەلى تۇردە جالعاسۋدا. مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس وڭىردە اۋىلدىق ەلدى مەكەندەردىڭ الەۋەتىن ارتتىرۋ، مادەنيەت سالاسىن قولداۋ ماقساتىندا جاڭا مادەنيەت نىساندارى پايدالانۋعا بەرىلىپ جاتىر.
وسى باعىتتاعى جۇمىستار اياسىندا سارىاعاش جانە كەلەس اۋداندارىندا كىتاپحانالارى بار جاڭا مادەنيەت ۇيلەرى ەل يگىلىگىنە تاپسىرىلدى. اشىلۋ راسىمدەرىنە تۇركىستان وبلىسىنىڭ اكىمى نۇرالحان كوشەروۆ قاتىسىپ، تۇرعىنداردى قۋانىشتى وقيعامەن قۇتتىقتادى.
ءوڭىر باسشىسى مادەنيەت سالاسىن دامىتۋ – ۇلتتىق رۋحانياتتى نىعايتۋدىڭ ماڭىزدى باعىتى ەكەنىن اتاپ ءوتتى.
– مادەنيەت – ۇلتتىڭ رۋحاني تىرەگى، ەلدىگىمىزدىڭ ايناسى. وبلىس قۇرىلعاننان بەرى 26 مادەنيەت ءۇيى مەن كلۋبتىڭ قۇرىلىسى اياقتالىپ، پايدالانۋعا بەرىلدى. بۇل جۇمىستار اۋىل تۇرعىندارىنىڭ مادەني ءومىرىن جانداندىرىپ، جاستاردىڭ شىعارماشىلىق الەۋەتىن دامىتۋعا باعىتتالعان. جاڭا مادەنيەت ۇيلەرى – ەلدىڭ باسىن قوساتىن، ۇلتتىق قۇندىلىقتاردى دارىپتەيتىن ماڭىزدى رۋحاني ورتالىقتار، – دەدى نۇرالحان كوشەروۆ.
سارىاعاش اۋدانىنا قاراستى تەگىسشىل اۋىلدىق وكرۋگىنىڭ مادەنيەت اۋىلىندا كىتاپحاناسى بار 75 ورىندىق مادەنيەت ءۇيى پايدالانۋعا بەرىلدى. نىساننىڭ قۇرىلىسىنا وبلىستىق بيۋدجەتتەن 291 ميلليون تەڭگە بولىنگەن. زاماناۋي عيماراتتا كورەرمەن زالى، كىتاپحانا، شىعارماشىلىق ۇيىرمەلەرگە ارنالعان كابينەتتەر مەن قىزمەتتىك بولمەلەر ورنالاسقان.
ايتا كەتەيىك، مادەنيەت اۋىلى وتكەن جىلى وبلىستىق «ۇلگىلى اۋىل» بايقاۋىندا ءىى ورىن العان. سونداي-اق اۋىلدا وبلىستىق بيۋدجەت ەسەبىنەن بالالارعا ارنالعان سپورت جانە ويىن الاڭشاسى دا سالىنعان.
ال كەلەس اۋدانىنىڭ جۇزىمدىك اۋىلدىق وكرۋگىندە 149 ورىندىق جاڭا مادەنيەت ءۇيى مەن كىتاپحانا پايدالانۋعا بەرىلدى. زاماناۋي تالاپتارعا ساي بوي كوتەرگەن نىساندا كورەرمەن زالى، كىتاپحانا، كونفەرەنتس-زال، حورەوگرافيا كابينەتى، شىعارماشىلىق ۇيىرمەلەرگە ارنالعان بولمەلەر قاراستىرىلعان. مۇندا مادەني-كوپشىلىك ءىس-شارالار وتكىزۋگە جانە جاستاردىڭ ونەرىن دامىتۋعا بارلىق جاعداي جاسالعان.
وبلىس اكىمىنىڭ ايتۋىنشا، تۇركىستان وڭىرىندە مادەنيەت سالاسىن دامىتۋعا ەرەكشە كوڭىل ءبولىنىپ كەلەدى. بۇگىندە سارىاعاش اۋدانىندا بەس، كەلەس اۋدانىندا ءتورت مادەنيەت ءۇيى پايدالانۋعا بەرىلگەن. سونىمەن قاتار بيىل كەلەس اۋدانىندا جاڭا اۋداندىق مۋزەيدىڭ قۇرىلىسىن اياقتاپ، ەل يگىلىگىنە بەرۋ جوسپارلانىپ وتىر.
سالتاناتتى راسىمدەر بارىسىندا اۋىل اقساقالدارى مەن وبلىس اكىمى جاڭا مادەنيەت ۇيلەرىنىڭ لەنتاسىن قيىپ، نىسانداردى رەسمي تۇردە پايدالانۋعا بەردى.
