تۇركىستان وبلىسىندا قازاقستان پرەزيدەنتى قاسىم-جومارت توقاەۆتىڭ قاتىسۋىمەن وتەتىن ۇلتتىق قۇرىلتايعا 390 ملن تەڭگە بولىنگەندىگى اقپارات قۇرالدارىندا ايتىلا باستاعانى ءمالىم. قوماقتى قارجىسىمەن كوپشىلىك نازارىن اۋدارعان تۇركىستانداعى ۇلتتىق قۇرىلتايدىڭ نەگىزگى وتىرىسى بۇگىن وتەدى دەپ جوسپارلانعان، دەپ حابارلايدى "ادىرنا" ۇلتتىق پورتالى.
ەسكە سالايىق، ۇلتتىق قۇرىلتايدىڭ العاشقى وتىرىسى بىلتىر 16 ماۋسىمدا ۇلىتاۋ وبلىسىندا وتكەن بولاتىن. القالى جيىندا ءسوز سويلەگەن مەملەكەت باسشىسى كەلەسى باسقوسۋدى كيەلى تۇركىستاندا وتكىزۋدى ۇسىنعان ەدى.
«قۇرىلتايدىڭ ءار ايماقتا ءوتۋى سول ءوڭىردىڭ دامۋىنا سەرپىن بەرەدى. ونىڭ مۇشەلەرى ءار جولى ءبىر ءوڭىردىڭ تىنىس-تىرشىلىگىمەن تانىسادى»، – دەدى ق.توقاەۆ.جيىنعا مەملەكەت باسشىسى قاسىم-جومارت توقاەۆ قاتىسادى دەپ جوسپارلانعان. قۇرىلتاي وتەتىن الاڭ قازاقتىڭ 12 قاناتتى كيىز ءۇيى ءتارىزدى بەزەندىرىلگەن. ءار ايماقتان جينالعان ءتۇرلى سالا وكىلدەرى كەشە تۇركىستانعا كەلىپ، العاشقى سەكتسيالىق جۇمىستارعا قاتىستى. قۇرىلتاي بارلىق وبلىستىڭ، سان ءتۇرلى سالانىڭ، ءار بۋىننىڭ وكىلدەرىن قامتيدى. مۇندا ازاماتتىق ۇستانىمى بار ورتا بۋىننىڭ تاجىريبەسى، جاڭاشا ويلايتىن جاستاردىڭ تىڭ يدەيالارى ورتاعا سالىنادى. ورايى كەلگەندە ايتا كەتەيىك، وسىدان بىرنەشە كۇن بۇرىن تۇركىستانداعى ۇلتتىق قۇرىلتايدى وتكىزۋگە 390 ملن تەڭگە جۇمسالاتىندىعى بۇقارالىق اقپارات قۇرالدارىندا ايتىلعان ەدى.
"ادىرنا" ۇلتتىق پورتالى
