تۇركىستان وبلىسىندا بولعان جول-كولىك وقيعاسى سالدارىنان ءبىر وتباسىنىڭ بەس بالاسى كوز جۇمدى، دەپ حابارلايدى "ادىرنا" ۇلتتىق پورتالى.
تاعى ءبىر بالا اۋىر جاراقات الىپ، اۋرۋحاناعا جەتكىزىلدى.
جەرگىلىكتى Otyrar باسىلىمىنىڭ مالىمەتىنشە، قايعىلى وقيعا تۇلكىباس اۋدانىنداعى ەڭبەكشى اۋىلىندا بولعان. الدىن الا مالىمەت بويىنشا، Volkswagen Polo اۆتوكولىگىنىڭ جۇرگىزۋشىسى رولگە يە بولا الماي، كولىك جولدان شىعىپ كەتىپ، اعاشقا سوعىلعان. سوققىنىڭ قاتتى بولعانى سونشالىق، جەڭىل اۆتوكولىك ەكىگە بولىنگەن. دارىگەرلەر اۋىر جاراقات العان بالانىڭ ءومىرىن ساقتاپ قالدى. قازىرگى تاڭدا ونىڭ جاعدايى اۋىر دەپ باعالانۋدا. اتا-اناسىنىڭ وتىنىشىنە سايكەس، بالانىڭ دەنساۋلىق جاعدايىنا قاتىستى تولىق اقپارات جاريالانبايدى.
اتالعان جول-كولىك وقيعاسى بويىنشا قىلمىستىق ءىس قوزعالدى. پوليتسيا وقيعانىڭ ءمان-جايىن انىقتاۋ جۇمىستارىن جۇرگىزىپ جاتىر. باس پروكۋراتۋرانىڭ مالىمەتىنشە، 2026 جىلدىڭ العاشقى بەس ايىندا تۇركىستان وبلىسىندا 461 جول-كولىك وقيعاسى تىركەلگەن. سونىڭ سالدارىنان 100 ادام قازا تاۋىپ، 573 ادام ءتۇرلى دارەجەدەگى جاراقات العان.
