دەنساۋلىق ساقتاۋ مينيسترلىگىنەن كەيىن 250-گە جۋىق ەمدەۋ كابينەتى جابىلدى، دەپ حابارلايدى "ادىرنا".
دەنساۋلىق ساقتاۋ مينيسترلىگى زاڭسىز مەديتسينالىق قىزمەت فاكتىلەرىن جانە مەديتسينالىق كومەك كورسەتۋ كەزىندە ستاندارتتاردىڭ بۇزىلۋىن انىقتاۋ ءۇشىن رەسپۋبليكا بويىنشا جەكە ەمشارا كابينەتتەرىن تەكسەرۋدى جالعاستىرىپ جاتىر. ارالاۋ بارىسىندا مونيتورينگتىك توپتار تۇرلىك بۇزۋشىلىققا جول بەرگەن نەمەسە ليتسەنزيالارعا قاجەتتى قوسىمشالارسىز 406 نىساندى انىقتادى.
اتالعان كابينەتتەردە مەديتسينالىق قىزمەتتى ليتسەنزياسىز جۇرگىزۋ، سانيتاريالىق ەرەجەلەردى جانە دارىلىك زاتتاردى دۇرىس ساقتاماۋ ءتارىزدى بۇزۋشىلىقتار انىقتالعان.
ء"تۇسىندىرۋ جۇمىستارى جۇرگىزىلگەننەن كەيىن 247 ەمشارا كابينەتى ءوز ەركىمەن قىزمەتىن توقتاتتى. سانيتاريالىق تالاپتارعا ساي، ەمشارا كابينەتتەرى ەپيدەميولوگيالىق تۇرعىدان وتە ماڭىزدى نىسانداردىڭ قاتارىنا جاتادى. سوندىقتان ولار دەنساۋلىق ساقتاۋ ۇيىمدارىنا قويىلاتىن بارلىق تالاپتاردى تولىق ورىنداۋى ءتيىس. سونىمەن بىرگە، زاڭناما ورتا مەديتسينا قىزمەتكەرلەرىنىڭ (مەيىربيكەلەردىڭ) قانداي قىزمەت كورسەتە الاتىنىن ناقتى بەلگىلەيدى. بۇل ەرەجەلەر ولارعا ءينۆازيۆتى (دەنەگە ەنۋ ارقىلى جاسالاتىن) پروتسەدۋرالاردى ورىنداۋعا رۇقسات بەرمەيدى. ياعني مۇنداي قىزمەتتەردى ءتيىستى ليتسەنزياسىز كورسەتۋگە بولمايدى. قالعان نىساندارعا تەكسەرۋلەر جالعاسا بەرەدى", - دەلىنگەن حابارلامادا.
بۇگىنگى تاڭدا 84 ەمشارا كابينەتىنە قاتىستى جوسپاردان تىس تەكسەرۋلەر اياقتالدى. تەكسەرۋ بارىسىندا مىناداي بۇزۋشىلىقتار انىقتالدى:
● مەديتسينالىق قىزمەتتى ليتسەنزياسىز جۇرگىزۋ;
● سانيتاريالىق ەرەجەلەردى ساقتاماۋ;
● دارىلىك زاتتاردى دۇرىس ساقتاماۋ;
● بىلىكتى مەديتسينالىق پەرسونالدىڭ بولماۋى;
● شۇعىل كومەك كورسەتۋ ءۇشىن جيىنتىقتىڭ بولماۋى.
جۇمىس قورىتىندىسى بويىنشا 15 ملن تەڭگەدەن استام سوماعا 122 اكىمشىلىك حاتتاما جاسالدى. دەنساۋلىق ساقتاۋ مينيسترلىگى پاتسيەنتتەردىڭ قاۋىپسىزدىگىن قامتاماسىز ەتۋ جانە دەنساۋلىق ساقتاۋ نىساندارىندا سانيتاريالىق-ەپيدەميولوگيالىق تالاپتاردى ساقتاۋ ماقساتىندا مونيتورينگ پەن باقىلاۋدى جالعاستىرادى.
