قازاقستاندا شەتەلدە كەڭىنەن قولدانىلاتىن كەيبىر دارىلەردىڭ ءدارىحانالاردا بولماۋى جانە تاپسىرىسپەن جەتكىزىلەتىن پرەپاراتتاردىڭ بىرنەشە ەسە قىمبات ساتىلۋى قۇرىلتاي دەپۋتاتى اسحات ايماعامبەتوۆتىڭ سىنىنا سەبەپ بولدى، دەپ حابارلايدى "ادىرنا".
دەپۋتات ازاماتتاردى جەكە قابىلداۋ كەزىندە ايتىلعان شاعىمداردىڭ ءبىرىن مىسالعا كەلتىردى. ناۋقاسقا Helicobacter pylori ينفەكتسياسىن ەمدەۋ ءۇشىن 14 كۇندىك كۋرسقا 20 مگ دوزاداعى «ۆونوپرازان» پرەپاراتىنىڭ 28 تابلەتكاسى تاعايىندالعان. الايدا قاجەتتى ءدارىنى قازاقستاننان ساتىپ الۋ وڭاي ەمەس.
"جاپونيادا Takeda ءوندىرىسىنىڭ تۇپنۇسقا Takecab پرەپاراتىنىڭ ءدال مۇنداي كولەمىنىڭ رەسمي باعاسى شامامەن 11 مىڭ تەڭگەنى قۇرايدى. مالايزيادا جاپون ءوندىرىسىنىڭ وسى پرەپاراتىنىڭ 30 تابلەتكالىق قاپتاماسى 27-30 مىڭ تەڭگە تۇرادى. قازاقستاندا پرەپارات ادەتتەگى ءدارىحانالاردا جوق. ال تاپسىرىسپەن 100 تابلەتكالىق قاپتاماسىن 463 مىڭ تەڭگەگە جانە ودان دا قىمباتقا ۇسىنادى. سوندا پاتسيەنت نە تاعايىندالعان ەمنەن باس تارتۋى كەرەك، نە وزىنە قاجەتتىدەن ءتورت ەسەگە جۋىق ارتىق تابلەتكا ساتىپ الىپ، ول ءۇشىن جۇزدەگەن مىڭ تەڭگە تولەۋگە ءماجبۇر»، — دەپ مالىمدەدى.
دەپۋتات ەلدەگى باعا ايىرماشىلىعىنا نازار اۋدارىپ، ءبىر تابلەتكانىڭ قۇنى جاپونياداعى رەسمي باعادان شامامەن 12 ەسە جوعارى ەكەنىن اتاپ ءوتتى.
ايماعامبەتوۆتىڭ ايتۋىنشا، بيىل دارىلىك پرەپاراتتاردى تىركەۋ ءراسىمىن جەڭىلدەتۋگە، اقش-تىڭ FDA سەكىلدى حالىقارالىق رەتتەۋشى ورگاندار ماقۇلداعان دارىلەردى جەدەلدەتىلگەن تارتىپپەن تىركەۋگە جانە ء«بىر تەرەزە» قاعيداتىن ەنگىزۋگە باعىتتالعان زاڭ قابىلدانعان. دەگەنمەن جاڭا تەتىكتەر ءىس جۇزىندە ءالى تولىققاندى جۇمىس ىستەمەي وتىر.
وسىعان بايلانىستى دەپۋتات ءدارى-دارمەكتىڭ قولجەتىمدىلىگىن ارتتىرۋ ماسەلەسىن جۇيەلى تۇردە شەشۋ قاجەتتىگىن جەتكىزدى.
«بۇل جاعداي بىزگە زاڭ قابىلداۋدىڭ جەتكىلىكسىز ەكەنىن تاعى ءبىر مارتە كورسەتتى. ەگەر زاماناۋي پرەپاراتتار ءدارىحانالاردا ءالى دە جوق بولسا، ال ازاماتتار ولاردى شەتەلدەن ىزدەۋگە نەمەسە بىرنەشە ەسە ارتىق تولەۋگە ءماجبۇر بولسا، وندا جاڭا مەحانيزم ءالى ءتيىستى دارەجەدە جۇمىس ىستەپ كەتپەگەنى. ونىڭ ۇستىنە، ماسەلە تەك تىركەۋدە دە ەمەس. ءبىزدىڭ نارىقتا جوق، سۇرانىسقا يە پرەپاراتتاردى جۇيەلى تۇردە انىقتاۋ، وندىرۋشىلەرمەن جۇمىس ىستەۋ، جەتكىزۋدى جەڭىلدەتۋ جانە پاتسيەنتكە قاجەتتى 28 تابلەتكانىڭ ورنىنا جۇزدەگەن مىڭ تەڭگەگە 100 تابلەتكالىق قاپتاما ۇسىنىلاتىن جاعدايلارعا جول بەرمەۋ قاجەت. بۇل ماسەلەنى كوميتەت وتىرىسىندا جانە قۇرىلتايدا كوتەرەتىن بولامىز. زاڭ قابىلداندى. ەندى ونىڭ جۇمىس ىستەۋىنە قول جەتكىزۋ كەرەك. باستى ناتيجە — قاعازداعى قىسقارتىلعان مەرزىمدەر ەمەس، پاتسيەنت ءۇشىن قولجەتىمدى باعادا ءدارىحانادا قاجەتتى ءدارىنىڭ بولۋى. ءدارى-دارمەك كوبەيگەندە، بۇل باعاعا دا اسەر ەتەدى»، - دەدى ول.
دەپۋتات ماسەلەنى ءتيىستى كوميتەت وتىرىسىندا جانە قۇرىلتايدا كوتەرەتىنىن مالىمدەدى. ونىڭ پىكىرىنشە، قابىلدانعان زاڭنىڭ ناتيجەسى دارىحانالارداعى قاجەتتى پرەپاراتتاردىڭ ناقتى قولجەتىمدىلىگىمەن جانە پاتسيەنتتەر ءۇشىن باعانىڭ قولايلى بولۋىمەن باعالانۋى ءتيىس.
