دەنساۋلىق ساقتاۋ سالاسىندا جاساندى ينتەللەكت ۇلكەن كولەمدەگى دەرەكتەردى وڭدەۋ، جەكەلەگەن پروتسەستەردى اۆتوماتتاندىرۋ مەنماماندارعا شەشىم قابىلداۋعا قولداۋ كورسەتۋ ماقساتىندا جۇيەلى تۇردە قولداناتىن جۇمىس قۇرالىنا اينالىپ كەلەدى.
ءمامس 2.0 ترانسفورماتسياسى اياسىندا الەۋمەتتىك مەديتسينالىق ساقتاندىرۋ قورى دا بىرنەشە باعىت بويىنشا جي-قۇرالدارىن دامىتىپ، سىناق جۇمىستارىن جۇرگىزۋدە. نەگىزگى مىندەت پروتسەستەردى اشىق ەتۋ، قولمەن اتقارىلاتىن جۇمىس كولەمىن ازايتۋ جانە ىقتيمال تاۋەكەلدەردى ەرتە كەزەڭدە انىقتاۋ.
ءبىرىنشى باعىتتاردىڭ ءبىرى – جاساندى ينتەللەكتى ءمامس ماسەلەلەرى بويىنشا ازاماتتارعا بەرىلەتىن كەڭەستەردىڭ ساپاسىن باقىلاۋ بارىسىندا قولدانۋ.
جي-جۇيە قوڭىراۋلاردى تالدايدى، قاتە نەمەسە تولىق ەمەس جاۋاپتاردى انىقتاۋعا كومەكتەسەدى جانە قولمەن تەكسەرۋ ءۇشىن تاڭداۋلى حابارلامالاردى قالىپتاستىرادى. بۇل ەڭ الدىمەن قولمەن باقىلاۋ كولەمىن ازايتۋعا جانە مامانداردىڭ نازارىن قوسىمشا باعالاۋدى تالاپ ەتەتىن كەڭەستەرگە نازار اۋدارۋعا مۇمكىندىك بەرەدى.
قازىرگى ۋاقىتتا بۇل قىزمەت سىناق رەجيمىندە جۇمىس ىستەپ تۇر. كەلەشەكتە ول كۇندەلىكتى قىزمەتتىك تاپسىرمالاردى ورىنداۋعا جانە اكىمشىلىك جۇكتەمەنى ازايتۋعا ارنالعان جي-كومەكشىنىڭ ءبىر بولىگىنە اينالادى.
جي-قۇرالدارىن قولدانۋدىڭ ەكىنشى باعىتى – پروتسەستەر بىرىڭعاي دەرەكتەرگە، ولشەمدەر مەن ەرەجەلەرگە نەگىزدەلە الاتىن سالالاردا ەنگىزۋ. بۇل ادام فاكتورىنىڭ اسەرىن ازايتۋعا جانە قابىلداناتىن شەشىمدەردىڭ نەگىزدەرىن تۇسىنىكتى ءارى تەكسەرىلەتىندەي ەتۋگە مۇمكىندىك بەرەدى، بۇل ءوز كەزەگىندە پروتسەستەردىڭ اشىقتىعىن ارتتىرىپ، سىبايلاس جەمقورلىق تاۋەكەلدەرىن بارىنشا ازايتادى.
مۇنداي تاسىلدەر مەديتسينالىق قىزمەتتەردى ستراتەگيالىق ساتىپ الۋدا، مەديتسينالىق كومەك كولەمىن جوسپارلاۋدا جانە جەتكىزۋشىلەردىڭ قىزمەتىنە مونيتورينگ جاساۋ كەزىندە قولدانىلۋى مۇمكىن.
جاساندى ينتەللەكت ۇلكەن اقپارات جيىندارىن سالىستىرۋعا، اۋىتقۋلاردى انىقتاۋعا جانە تالدامالىق ۇسىنىستار قالىپتاستىرۋعا كومەكتەسەدى. بۇل رەتتە شەشىمدەر قور ماماندارىنىڭ قاتىسۋىمەن بەلگىلەنگەن تارتىپتە قابىلداناتىن بولادى.
دامۋدىڭ ءۇشىنشى ۆەكتورى – مەديتسينالىق كومەككە اقى تولەۋ كەزىندەگى ىقتيمال بۇزۋشىلىقتاردى انىقتاۋعا ارنالعان انتيفرود-جۇيەگە جي-قۇرالدارىن ەنگىزۋ.
جىل سايىن قور كورسەتىلگەن ميلليونداعان مەديتسينالىق قىزمەتتەر تۋرالى مالىمەتتەردى وڭدەيدى. جەدەل ءارى ءدال مونيتورينگ جۇرگىزۋ ءۇشىن قولدانىستاعى فورمالدى-لوگيكالىق باقىلاۋلار دەرەكتەردى تالداۋ قۇرالدارىمەن جانە جاساندى ينتەللەكت تەحنولوگيالارىمەن تولىقتىرىلۋدا.
اتاپ ايتقاندا، ماشينالىق وقىتۋدى قولدانا وتىرىپ، ۇسىنىلاتىن قىزمەتتەردەگى اۋىتقۋلاردىڭ تاۋەكەلىن باعالاۋ مودەلدەرى ازىرلەنۋدە. ولار مەديتسينالىق كومەككە اقى تولەنگەنگە دەيىن بەيتيپتىك كورسەتكىشتەر مەن ىقتيمال بۇزۋشىلىقتاردى تابۋعا كومەكتەسەدى.
مىندەتى – بۇزۋشىلىقتاردى ورىن العاننان كەيىن ەمەس، قاراجات اۋدارىلعانعا دەيىن انىقتاۋعا كوشۋ. بۇل رەتتە تولىق اۆتوماتتاندىرۋ تۋرالى ءسوز بولىپ وتىرعان جوق. جي دەرەكتەرگە باستاپقى تالداۋ جۇرگىزەدى، ال تۇپكىلىكتى باعانى قور ماماندارى بەرەدى.
تاعى ءبىر باعىت – تاۋەكەلدەردى باسقارۋ جۇيەسىن دامىتۋ. ونىڭ مىندەتى مەديتسينالىق كومەكتى جەتكىزۋشىنىڭ ىقتيمال تاۋەكەلدەرىن الدىن الا بەلگىلەۋ، ال مونيتورينگ پەن تولەم جۇرگىزۋ ءتارتىبى ونىڭ تاۋەكەل-پروفيلىنە بايلانىستى بولاتىن تاۋەكەلگە باعدارلانعان مودەلگە كوشۋ.
قوردىڭ سيتۋاتسيالىق-تالدامالىق ورتالىعى Nazarbayev University-مەن بىرلەسىپ تاۋەكەلگە باعدارلانعان مودەلدىڭ كريتەريلەرى مەن ينديكاتورلارىن، سونداي-اق تاۋەكەل-دالىزدەرىنىڭ شەكارالارىن ازىرلەۋدە.
مودەل اياسىندا ءۇش تاۋەكەل-ءدالىزى قاراستىرىلعان – Senim, Baqylau جانە Qauip. ولار تاۋەكەلگە باعدارلانعان مونيتورينگتىڭ نەگىزىنە اينالادى. كەلەسى كەزەڭدە ولاردىڭ مۇمكىندىكتەرىن جاساندى ينتەللەكت پەن ماشينالىق وقىتۋ تەحنولوگيالارى ەسەبىنەن كۇشەيتۋ جوسپارلانۋدا.
ازىرلەنىپ جاتقان مودەل جەتكىزۋشىنى اۆتوماتتى تۇردە تاۋەكەلدىڭ ءۇش دەڭگەيىنىڭ بىرىنە جاتقىزادى: تومەن، ورتاشا نەمەسە جوعارى.
اۆتوماتتى تالداۋ ناتيجەلەرى تۇپكىلىكتى شەشىم بولمايدى. ەگەر جەتكىزۋشى باعالاۋ ناتيجەلەرىمەن كەلىسپەسە، ول تۇسىنىكتەمەلەر، قارسىلىقتار مەن راستايتىن قۇجاتتاردى ۇسىنا الادى. ولار قاراستىرىلىپ، نەگىز بولعان جاعدايدا باعالاۋ ناتيجەلەرى قايتا قارالۋى مۇمكىن.
بارلىق جي-قۇرالدارىنا قاۋىپسىزدىك، ساپا مەن سۇيەمەلدەۋگە قويىلاتىن بىرىڭعاي تالاپتار قولدانىلادى. جاساندى ينتەللەكت ەڭ الدىمەن دەرەكتەردى وڭدەۋ مەن تالداۋعا ارنالعان كومەكشى قۇرال رەتىندە قاراستىرىلادى، ول ادامنىڭ كاسىبي شەشىمىن الماستىرمايدى.
جي-قۇرالدارىن ەنگىزۋ 2029 جىلعا دەيىنگى «Digital Qazaqstan» اۋقىمدى تسيفرلاندىرۋ جانە جاساندى ينتەللەكت تەحنولوگيالارىن ەنگىزۋدىڭ جالپىۇتتىق ستراتەگياسى شەڭبەرىندە ىسكە اسىرىلۋدا.
