11 قاراشا كۇنى قازاقستاننىڭ فرانتسياداعى ەلشىلىگى جانىنداعى اباي اتىنداعى مادەنيەت جانە ادەبيەت ورتالىعىندا فرانتسۋز تىلىندە باسىلىپ شىققان «1812 جىل: سوعىس جانە بەيبىتشىلىك (قازاقى نۇسقا)» تريلوگياسىنىڭ تۇساۋكەسەرى ءوتتى.
شاراعا قاتىسقان قازاقستاننىڭ فرانتسياداعى ەلشىلىگىنىڭ ەكىنشى حاتشىسى بولات وتەگەن، قازاقستاننىڭ فرانتسياداعى ەلشىلىگىنىڭ پاريجدەگى كونسۋلى مارات باقتياروۆ فرانتسيا ەلىندەگى قازاق قاۋىمداستىعىنىڭ توراعاسى رەدجەپ قاناي، اباي اتىنداعى مادەنيەت جانە ادەبيەت ورتالىعىنىڭ ءتورايىمى بايان جانباۋوۆا، پاريجدە تۇراتىن اقىن تولەگەن ايبەرگەنوۆتىڭ قىزى اينار ايبەرگەنوۆا، تاربيە جانە ءبىلىم سالاسىنىڭ ارداگەرى نادين پەارا، پاريجدەگى "ALEM" اسسوتسياتسياسىنىڭ ۆيتسە-پرەزيدەنتى مايرا ىسقاقوۆا، سوربوننا ۋنيۆەرسيتەتىنىڭ ستۋدەنتى توما كەتارلار تۋىندىنىڭ قۇندىلىعىنا توقتالىپ، ويلارىن ورتاعا سالدى. سونىمەن قاتار جەرگىلىكتى زيالى قاۋىم وكىلدەرى، ستۋدەنتتەر، پاريجدەگى قازاق قاۋىمداستىعىنىڭ وكىلدەرى قاتىستى.
ءوز كەزەگىندە ءسوز العان تۋىندى اۆتورى، حالىقارالىق «الاش» ادەبي سىيلىعىنىڭ يەگەرى، قازاقستاننىڭ قۇرمەتتى جازۋشىسى جالعاسقالي دۇتماعانبەتوۆ «1812 جىل: سوعىس جانە بەيبىتشىلىك (قازاقى نۇسقا)» تريلوگياسىنىڭ جازىلۋ بارىسى تۋراسىندا ايتىپ بەردى.
ء«بىز ناپولەوننىڭ اسكەرىن وكشەلەپ قۋىپ، پاريجگە دەيىن بارعان ورىس اسكەرىنىڭ قۇرامىندا شايقاسقان قازاقتار ەرەكشە ەرلىك جاساعانىن فرانتسۋز تاريحشىلارىنىڭ ايتۋى بويىنشا بىلدىك. كىتاپتاردا ەكى ءجۇز جىلدىق تاعدىرىمىز ناقتى دەرەك كوزدەرىنە سۇيەنە وتىرىپ باياندالدى. ارحيۆتىك ماتەريالدار پايدالانىلدى» - دەدى ول.
ءبىر قىزىعى، بۇل سوعىسقا اۆتوردىڭ بابالارى قاتىسقان. ءبىر باباسى فرانتسيادان جالعىز قايتپاي، فرانتسۋز قىزى ميشەل دەگەن سۇلۋدى الا قايتادى. وكىنىشتىسى، ول بوسانىپ جاتقاندا كوز جۇمادى. ومىرگە ۇل كەلەدى، ول وسەدى، ۇرپاق ۇلاستىرادى. بۇگىندە فرانتسۋزدىڭ جيەنشارلارى اتىراۋ وبلىسىندا ءبىرشاما. سولاردىڭ بويىنداعى قان ۇزىلمەي، ارادا الدەنەشە ۇرپاق وتسە دە، اق سارى، كوزدەرى كوك بولىپ كەلەدى ەكەن. كىتاپتا فوتوسۋرەتتەر دە بەرىلگەن. سونىڭ ءبىرى دوسسور اۋىلىندا، بايباقتى اتا قورىمىنداعى ميشەلدىڭ بەيىتىنىڭ سۋرەتى.
قازاق تاريحىندا اشىق ايتىلماي كەلە جاتقان اقتاڭداقتار از ەمەس. ءبىر اۋلەتتىڭ بۇرىنعىسى مەن بۇگىنگىسى ۇزىلمەي، جاتىق تىلمەن استاسا جالعاسىپ جەتكىزىلەدى. اسىرە بوياۋدان اۋلاق ءۇش توم اۆتوردىڭ ءوز قارجىلاندىرۋى بويىنشا از تارالىممەن عانا «جارىق كوردى. تاعى ءبىر ەرەكشەلىگى، قازاقشا نۇسقاسى تانىمال كاسىبي اۋدارماشىلاردىڭ ارقاسىندا ورىس، اعىلشىن جانە فرانتسۋز تىلدەرىندە دە باسىلىپ شىقتى. اۋدارما ساپاسىنا ەرەكشە ءمان بەرگەن اۆتور ابىلايحان اتىنداعى الەم تىلدەرى ۋنيۆەرسيتەتىنىڭ ۇستازدار ۇجىمىمەن بەرىك بايلانىستا بولىپ، اۋداماشىلارمەن دە شىعارماشىلىق تۇرعىدا جۇمىس ىستەگەن. سونىڭ ناتيجەسىندە وتكەن كىتاپتىڭ فرانتسيا ەلىندەگى فرانتسۋز تىلىندەگى نۇسقاسىنىڭ تانىستىرىلىمى پاريج جۇرتشىلىعىنىڭ قىزىعۋشىلىعىن تۋدىردى.
