11 qaraşa künı Qazaqstannyŋ Fransiiadaǧy elşılıgı janyndaǧy Abai atyndaǧy mädeniet jäne ädebiet ortalyǧynda fransuz tılınde basylyp şyqqan «1812 jyl: Soǧys jäne Beibıtşılık (Qazaqy nūsqa)» trilogiiasynyŋ tūsaukeserı öttı.
Şaraǧa qatysqan Qazaqstannyŋ Fransiiadaǧy elşılıgınıŋ ekınşı hatşysy Bolat Ötegen, Qazaqstannyŋ Fransiiadaǧy elşılıgınıŋ Parijdegı konsuly Marat Baqtiiarov Fransiia elındegı Qazaq qauymdastyǧynyŋ töraǧasy Redjep Qanai, Abai atyndaǧy mädeniet jäne ädebiet ortalyǧynyŋ töraiymy Baian Janbauova, Parijde tūratyn aqyn Tölegen Aibergenovtyŋ qyzy Ainar Aibergenova, tärbie jäne bılım salasynyŋ ardagerı Nadin Peara, Parijdegı "ALEM" assosiasiiasynyŋ vise-prezidentı Maira Ysqaqova, Sorbonna universitetınıŋ studentı Toma Ketarlar tuyndynyŋ qūndylyǧyna toqtalyp, oilaryn ortaǧa saldy. Sonymen qatar jergılıktı ziialy qauym ökılderı, studentter, Parijdegı qazaq qauymdastyǧynyŋ ökılderı qatysty.
Öz kezegınde söz alǧan tuyndy avtory, Halyqaralyq «Alaş» ädebi syilyǧynyŋ iegerı, Qazaqstannyŋ Qūrmettı jazuşysy Jalǧasqali Dütmaǧanbetov «1812 jyl: Soǧys jäne Beibıtşılık (Qazaqy nūsqa)» trilogiiasynyŋ jazylu barysy turasynda aityp berdı.
«Bız Napoleonnyŋ äskerın ökşelep quyp, Parijge deiın barǧan orys äskerınıŋ qūramynda şaiqasqan qazaqtar erekşe erlık jasaǧanyn fransuz tarihşylarynyŋ aituy boiynşa bıldık. Kıtaptarda ekı jüz jyldyq taǧdyrymyz naqty derek közderıne süiene otyryp baiandaldy. Arhivtık materialdar paidalanyldy» - dedı ol.
Bır qyzyǧy, būl soǧysqa avtordyŋ babalary qatysqan. Bır babasy Fransiiadan jalǧyz qaitpai, Fransuz qyzy Mişel degen sūludy ala qaitady. Ökınıştısı, ol bosanyp jatqanda köz jūmady. Ömırge ūl keledı, ol ösedı, ūrpaq ūlastyrady. Bügınde fransuzdyŋ jienşarlary Atyrau oblysynda bırşama. Solardyŋ boiyndaǧy qan üzılmei, arada äldeneşe ūrpaq ötse de, aq sary, közderı kök bolyp keledı eken. Kıtapta fotosuretter de berılgen. Sonyŋ bırı Dossor auylynda, Baibaqty Ata qorymyndaǧy Mişeldıŋ beiıtınıŋ suretı.
Qazaq tarihynda aşyq aitylmai kele jatqan aqtaŋdaqtar az emes. Bır äulettıŋ būrynǧysy men bügıngısı üzılmei, jatyq tılmen astasa jalǧasyp jetkızıledı. Äsıre boiaudan aulaq üş tom avtordyŋ öz qarjylandyruy boiynşa az taralymmen ǧana «jaryq kördı. Taǧy bır erekşelıgı, qazaqşa nūsqasy tanymal käsıbi audarmaşylardyŋ arqasynda orys, aǧylşyn jäne fransuz tılderınde de basylyp şyqty. Audarma sapasyna erekşe män bergen avtor Abylaihan atyndaǧy Älem tılderı universitetınıŋ ūstazdar ūjymymen berık bailanysta bolyp, audamaşylarmen de şyǧarmaşylyq tūrǧyda jūmys ıstegen. Sonyŋ nätijesınde ötken kıtaptyŋ Fransiia elındegı fransuz tılındegı nūsqasynyŋ tanystyrylymy Parij jūrtşylyǧynyŋ qyzyǧuşylyǧyn tudyrdy.
