قازىرگى قوعامدا سمارتفون ءومىردىڭ اجىراماس بولىگىنە اينالدى. الايدا ونى شەكتەن تىس پايدالانۋ جاڭا الەۋمەتتىك پروبلەمانىڭ – فاببينگتىڭ كەڭ تارالۋىنا اكەلۋدە. فاببينگ دەگەنىمىز – اڭگىمەلەسىپ وتىرعان ادامدى ەلەمەي، نازاردى تەلەفونعا اۋدارۋ. بۇل قۇبىلىس اسىرەسە جاسوسپىرىمدەر اراسىندا ءجيى بايقالادى.
تەرمين «phone» (تەلەفون) جانە «snubbing» (ەلەمەۋ) سوزدەرىنەن شىققان. مامانداردىڭ ايتۋىنشا، فاببينگ كەزىندە ادام سويلەسۋ ۇستىندە سمارتفوندى قايتا-قايتا تەكسەرىپ، ۆيرتۋالدى اقپاراتتى شىنايى قارىم-قاتىناستان جوعارى قويادى. كەي جاعدايدا تەلەفونعا بەرىلگەن ادام اينالاسىندا وتىرعان جانداردى مۇلدە ۇمىتىپ كەتۋى مۇمكىن.
زەرتتەۋلەرگە سۇيەنسەك، ادامداردىڭ 17 پايىزى كۇنىنە كەمىندە ءتورت رەت فاببينگ جاسايتىنىن، ال 32 پايىزى وعان تۇراقتى تۇردە تاپ بولاتىنىن جەتكىزگەن. پسيحولوگتار بۇل ادەتتىڭ تۇلعاارالىق قاتىناسقا كەرى اسەر ەتەتىنىن ايتادى. اڭگىمەلەسۋشى ءوزىن قاجەتسىز سەزىنىپ، تۇسىنبەۋشىلىك پەن رەنىش پايدا بولادى. سونىمەن قاتار فاببينگ قۇرمەتسىزدىك پەن نازارسىزدىق بەلگىسى رەتىندە قابىلدانادى.
جاسوسپىرىمدەردىڭ فاببينگكە بەيىم بولۋىنا الەۋمەتتىك جەلىدەگى جاڭالىقتاردان قالماۋ نيەتى، ۆيرتۋالدى ورتادا ءوزىن سەنىمدى سەزىنۋ، مازاسىزدىقتى سمارتفون ارقىلى جەڭۋ تالپىنىسى جانە مارتەبەلىك باسەكە سەبەپ بولۋدا.
«وركەن» بالالاردى قولداۋ ورتالىعى پسيحولوگى سوفيا باشكاەۆانىڭ ايتۋىنشا، اتا-انالار ەڭ الدىمەن بالانىڭ تەلەفونعا نە سەبەپتى ءجيى الاڭدايتىنىن ءتۇسىنىپ، اشىق ديالوگ ورناتۋى ءتيىس. سونداي-اق جاسوسپىرىمدەرگە سپورت، شىعارماشىلىق، ۆولونتەرلىك سياقتى بالاما ارەكەتتەر ۇسىنىپ، ۇيدە گادجەت قولدانۋعا قاتىستى ورتاق ەرەجەلەر بەلگىلەۋ ماڭىزدى.
ماماندار فاببينگتەن ارىلۋ ءۇشىن اس كەزىندە تەلەفوندى قولدانباۋ، ونلاين جانە وفلاين ۋاقىتتى جوسپارلاۋ، دوستارمەن كەزدەسكەندە سمارتفونسىز بولۋعا كەلىسۋ سەكىلدى داعدىلاردى قالىپتاستىرۋدى ۇسىنادى.
ساراپشىلاردىڭ پىكىرىنشە، فاببينگ – تسيفرلىق قوعامنىڭ جاڭا سىن-قاتەرى. جاسوسپىرىمدەردىڭ شىنايى ومىرگە قىزىعۋشىلىعىن ارتتىرۋ، ولارمەن سەنىمدى قارىم-قاتىناس ورناتۋ جانە قولداۋ كورسەتۋ – بۇل ادەتتىڭ الدىن الۋدىڭ باستى جولى.
