اقش وكىلدەر پالاتاسىنىڭ دەموكراتتاردان قۇرالعان قاداعالاۋ كوميتەتى 2019 جىلى تۇرمەدە ءولىمى ورىن العان، سەكسۋالدىق سيپاتتاعى قىلمىستار مەن پەدوفيلياعا قاتىستى ايىپتالعان قارجىگەر دجەففري ەپشتەيننىڭ تۇرعىن ۇيىنەن 19 جاڭا سۋرەت جاريالادى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
باق بەتىندە جاريالانعان فوتولاردا اقش پرەزيدەنتى دونالد ترامپ، ترامپتىڭ بۇرىنعى كەڭەسشىسى ستيۆ بەننون، اقش-تىڭ ەكس-پرەزيدەنتى بيلل كلينتون، Microsoft كومپانياسىنىڭ نەگىزىن قالاۋشى بيلل گەيتس، ۇلىبريتانيانىڭ حانشايىمى ەليزاۆەتا II-ءنىڭ ورتاڭعى ۇلى پرينتس ەندريۋ (ەندريۋ ماۋنتبەتتەن-ۆيندزور), اكتەر جانە رەجيسسەر ۆۋدي اللەن، بريتان كاسىپكەرى ريچارد برەنسون، بۇرىنعى اقش قارجى ءمينيسترى لارري ساممەرس، ادۆوكات الان دەرشوۆيتس بار.
دونالد ترامپ ەپشتەينمەن ۇزاق جىلدار بويى دوستىق قاتىناستا بولعانىن مالىمدەگەن. الايدا تۇلعاعا قاتىستى داۋ شىققاننان كەيىن ولاردىڭ قارىم-قاتىناسى 2004 جىلى، ەپشتەيننىڭ ءبىرىنشى رەت تۇتقىندالۋىنان بىرنەشە جىل بۇرىن، بۇزىلعانىن ايتقان. ترامپ ەپشتەيننىڭ قىلمىستارىنا قاتىسى بار دەگەن حابارلامالاردى بىرنەشە رەت جوققا شىعارعان. پرينتس ەندريۋ دا وزىنە تاعىلعان ايىپتاردى جوققا شىعارادى.
قاداعالاۋ كوميتەتىنىڭ دەموكرات كونگرەسسمەنى روبەرت گارسيا سۋرەتتەر ءارحيۆى 95 مىڭنان استام فوتودان تۇراتىنىن جانە دەموكراتتار ولاردىڭ ءبارىن زەرتتەيتىنىن ايتتى. جاڭا ماتەريالدار كەلەسى كۇندەر مەن اپتادا كەزەڭ-كەزەڭىمەن جاريالاناتىنى حابارلاندى.
ايتا كەتەيىك، بۇل سۋرەتتەر اقش ادىلەت مينيسترلىگى 19 جەلتوقسانعا دەيىن جاريالاۋى ءتيىس «ەپشتەين فايلدارىنىڭ» قۇرامىنا كىرمەيدى.
