امەريكالىق اكتريسا، بۇۇ-نىڭ بوسقىندار ماسەلەلەرى جونىندەگى بۇرىنعى ارنايى ەلشىسى اندجەلينا دجولي گازاعا باردى. بۇل تۋرالى Agenzia Nova جازدى، دەپ حابارلايدى "ادىرنا".
ول ءال-اريش اۋرۋحاناسىن جانە رافاح شەكارا بەكەتىنىڭ ەگيپەتتىك بولىگىن ارالاپ، قىزىل جارتى اي ۇيىمىنىڭ وكىلدەرى مەن گازا سەكتورىنا گۋمانيتارلىق كومەك تاسيتىن جۇك كولىكتەرىنىڭ جۇرگىزۋشىلەرىمەن كەزدەستى.
بۇۇ-نىڭ بوسقىندار ماسەلەلەرى جونىندەگى ەكس-ەلشىسىن گازاداعى ساپارى كەزىندە سولتۇستىك سيناي گۋبەرناتورى حالەد مەگاۆەر الىپ ءجۇردى. جالپى، گۋبەرناتور پالەستينالىق جاراقات العان ازاماتتاردىڭ ەگيپەتتەگى جاعدايىن كوزىمەن كورىپ، شەكاراداعى گۋمانيتارلىق كومەكتى تاراتۋ جۇمىسىن تەكسەرۋ ءۇشىن كەلگەن. وعان ەرىپ كەلگەن ايگىلى اكتريسا دا پالەستينالىقتاردىڭ جاعدايىمەن قانىقتى.
ساپار بارىسىندا دجولي گازاعا گۋمانيتارلىق كومەكتى جەتكىزۋ قالاي ۇيىمداستىرىلاتىنىمەن تانىسىپ، جۇك قابىلداۋ مەن تاراتۋعا تارتىلعان نىسانداردى ارالادى. سونداي-اق ول ەل-اريش قالاسىنداعى اۋرۋحاناعا بارىپ، جارالانعان پالەستيندىكتەردىڭ قالاي ەمدەلىپ جاتقانىن كوردى.
رافاح باقىلاۋ-وتكىزۋ پۋنكتىندە اكتريساعا گۋمانيتارلىق جۇكتەردى كىرگىزۋ ۇدەرىسى مەن كومەكتى ۇيلەستىرەتىن قىزمەتتەردىڭ جۇمىسى كورسەتىلدى. ساپار گازا سەكتورىنداعى كۇردەلى گۋمانيتارلىق احۋال جالعاسىپ جاتقان كەزەڭدە ءوتتى.
ايتا كەتسەك، بۇعان دەيىن اندجەلينا دجولي ۋكرايناعا دا بارىپ، مايدان شەبىنە جاقىن وڭىرلەردە بولىپ، سوعىس جاعدايىندا ءومىر ءسۇرىپ جاتقان وتباسىلارمەن كەزدەسكەن ەدى.
