شىمكەنت قالاسىندا تۇرعىن ءۇي كەشەندەرىنىڭ بىرىندە ليفت سەگىزىنشى قاباتتان قۇلاپ كەتتى، دەپ حابارلايدى “ادىرنا” ۇلتتىق پورتالى كتك-عا سىلتەپ.
ليفت ىشىندە بولعان بويجەتكەن اۋىر جاراقات الدى.
وقيعا جاڭا تۇرعىن ۇيلەردىڭ بىرىندە بولعان. كۋاگەرلەردىڭ ايتۋىنشا، ليفت سەگىزىنشى قاباتقا كوتەرىلگەن ساتتە كەنەتتەن تومەن قاراي قۇلاعان. سول كەزدە ادامدار ايقايلاعان داۋىس پەن اينەكتىڭ سىنعانىن ەستىگەن. ءبىراز ۋاقىتتان كەيىن ليفت كابيناسى قايتادان جەتىنشى قابات دەڭگەيىنە كوتەرىلگەن. وسى ساتتە ىشىندەگى قىز سىرتقا شىعارىلىپ، جەدەل جاردەم قىزمەتىنە تاپسىرىلعان.
تۇرعىن ءۇي كەشەنىنىڭ كۇزەتشىسىنىڭ ايتۋىنشا، ءليفتتىڭ قۇلاۋى تۇرعىندار اراسىندا ۇلكەن ابىر-سابىر تۋعىزعان.
بەلگىلى بولعانداي، بۇل تۇرعىن ءۇي كەشەنىندە ليفتكە قاتىستى توتەنشە جاعداي ەكىنشى رەت تىركەلىپ وتىر.
اتالعان دەرەك بويىنشا پوليتسيا قىلمىستىق ءىس قوزعادى.
