2026 جىلعى 9 اقپاندا كوكشەتاۋ قالاسىنداعى «قوعامدىق كەلىسىم» كمم كونفەرەنتس-زالىندا تۇركى الەمىنىڭ ۇلى ويشىلدارى اباي قۇنانباەۆ پەن الىشەر ناۋايدىڭ ادەبي-رۋحاني مۇراسىنا ارنالعان «اباي مەن ناۋاي: تۇركى رۋحانياتىنىڭ قوس شىڭى» اتتى دوڭگەلەك ۇستەل ءوتتى. تاعىلىمدى جيىنعا عىلىمي قاۋىم وكىلدەرى، ەتنومادەني بىرلەستىكتەر مۇشەلەرى، جاستار ۇيىمدارىنىڭ بەلسەندىلەرى مەن زيالى قاۋىم قاتىستى.
ءىس-شارانى اقمولا وبلىسى اكىمىنىڭ ورىنباسارى دوسۇلان ايتباەۆ جۇرگىزىپ، قازاق-وزبەك حالىقتارىنىڭ تاريحي-مادەني بايلانىستارى مەن رۋحاني ساباقتاستىعىنا توقتالدى. ول ەكى ەل اراسىنداعى ستراتەگيالىق سەرىكتەستىك مادەني-گۋمانيتارلىق ىنتىماقتاستىق ارقىلى دا نىعايا ءتۇسىپ وتىرعانىن اتاپ ءوتتى.
«بۇگىنگى كەزدەسۋ ەرەكشە ماڭىزعا يە. بىلتىر ۇلى اقىن، ويشىل اباي قۇنانباەۆتىڭ 180 جىلدىعىن اتاپ وتسەك، بيىل كورنەكتى وزبەك اقىنى ءارى مەملەكەت قايراتكەرى الىشەر ناۋايدىڭ 585 جىلدىعى اتالىپ وتۋدە. ەكى تۇلعانىڭ مۇراسى – تۇركى الەمىنىڭ ورتاق رۋحاني قازىناسى. بۇگىنگى دوڭگەلەك ۇستەل وسى قۇندىلىقتاردى تەرەڭىرەك زەردەلەۋگە مۇمكىندىك بەرەدى»، – دەدى دوسۇلان ايتباەۆ ءوز سوزىندە.
جيىنعا قازاقستان رەسپۋبليكاسىنداعى وزبەكستان رەسپۋبليكاسىنىڭ ەلشىلىگىنىڭ كونسۋلى اليزود سايداحمەدوۆ مەن ەلشىلىكتىڭ ءبىرىنشى حاتشىسى ۋلۋگبەك كالنازاروۆ ارنايى قاتىسىپ، ەكى حالىقتىڭ ورتاق ادەبي مۇراسى مەن رۋحاني قۇندىلىقتارىنىڭ ماڭىزى جونىندە پىكىر ءبىلدىردى.
كەزدەسۋ بارىسىندا قوعامدىق كەلىسىم مەن ەتنوسارالىق تاتۋلىقتى نىعايتۋعا ۇلەس قوسىپ جۇرگەن «اقمولا وبلىسىنىڭ وزبەك ەتنومادەني ورتالىعى» قوعامدىق بىرلەستىگىنىڭ ءتورايىمى، قازاقستان حالقى اسسامبلەياسى حاتشىلىعى توراعاسىنىڭ ورىنباسارى توجيبۋۆي مەدەتوۆا ءسوز سويلەپ، مادەني بايلانىستاردى دامىتۋداعى بىرلەسكەن جوبالاردىڭ ماڭىزىن اتاپ ءوتتى.
عىلىمي بولىمدە شوقان ءۋاليحانوۆ اتىنداعى كوكشەتاۋ ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ كانديداتى ءسابيت جامبەك «اباي مەن ناۋاي پوەزياسىنداعى ادامگەرشىلىك كونتسەپتىلەرى» تاقىرىبىندا بايانداما جاساپ، قوس ويشىل شىعارمالارىنداعى گۋمانيزم، بىلىمگە ۇمتىلۋ، ادامگەرشىلىك قاعيدالارىنىڭ ۇندەستىگىن جان-جاقتى تالدادى. ال وسى ۋنيۆەرسيتەتتىڭ PhD دوكتورى، پروفەسسور گۇلناز بوكەن قازىرگى قازاق جانە وزبەك پروزاسىنداعى قوعامدىق ءومىر كورىنىستەرى تۋرالى وي قوزعادى.
ءىس-شارا اياسىندا اقمولا وبلىسى قحا جانىنداعى «اسسامبلەيا جاستارى» وكىلدىگى مۇشەلەرى اباي مەن ناۋاي شىعارمالارىنان ۇزىندىلەر وقىپ، رۋحاني مۇرانىڭ جاس ۇرپاق ساناسىنداعى ورنى ايقىن كورىندى.
جيىن سوڭىندا قاتىسۋشىلار «ەركىن ميكروفون» فورماتىندا پىكىر الماسىپ، قوس كلاسسيكتىڭ مۇراسىن زەردەلەۋ، ونى ءبىلىم بەرۋ مەن مادەنيەت سالاسىندا كەڭىنەن ناسيحاتتاۋ ماسەلەلەرىن تالقىلادى.
دوڭگەلەك ۇستەل قورىتىندىسىندا اباي مەن ناۋاي مۇراسىنىڭ تۇركى الەمىنىڭ ورتاق رۋحاني قازىناسى ەكەنى، ولاردىڭ شىعارمالارى بۇگىنگى قوعام ءۇشىن دە وزەكتىلىگىن جوعالتپاعانى اتاپ ءوتىلدى. مۇنداي تاعىلىمدى كەزدەسۋلەر حالىقتار اراسىنداعى مادەني جاقىنداستىقتى تەرەڭدەتىپ، رۋحاني ساباقتاستىقتى نىعايتا تۇسەتىنى ءسوزسىز.
