قازاقستاننىڭ تابيعي كورىكتى ورىندارىنىڭ ءبىرى – شارىن شاتقالى حالىقارالىق رەيتينگتە جوعارى ورىنعا يە بولدى، دەپ حابارلايدى “ادىرنا”.
الەمنىڭ 46 ەلىنەن ىرىكتەلگەن 100 كانون مەن شاتقالدىڭ اراسىندا 17-ورىنعا جايعاستى. بۇل رەيتينگكە قازاقستاننان ەنگەن جالعىز تابيعي نىسان.
2026 جىلعى The Worldworthy 100 رەيتينگى بويىنشا شارىن ۇلتتىق تابيعي پاركى مەكسيكاداعى Basaseachic Canyon Falls شاتقالىنان كەيىن، فرانتسياداعى Gorges de Daluis كانونىنىڭ الدىندا ورنالاسقان.
زەرتتەۋ بارىسىندا رەيتينگ اۆتورلارى تۋريستىك پلاتفورمالارداعى پىكىرلەر مەن باعالاردى، حالىقارالىق تۋريستىك گيدتەر مەن بۇقارالىق اقپارات قۇرالدارىنداعى جاريالانىمداردى، سونداي-اق اشىق جانە رەسمي دەرەكتەردى نەگىزگە العان.
جوبا اۆتورلارىنىڭ مالىمەتىنشە، 2026 جىلعى رەيتينگتى ازىرلەۋ كەزىندە 34,8 ميلليوننان استام تۋريستىك پىكىر تالدانعان. ال شارىن ۇلتتىق پاركىنە بەرىلگەن باعا 5 مىڭنان استام ساياحاتشىنىڭ پىكىرى مەن باعاسىنا نەگىزدەلگەن.
ۇيىمداستىرۋشىلار رەيتينگكە نىساندار وزدىگىنەن ءوتىنىم بەرە المايتىنىن جانە جوعارى ورىن الۋ ءۇشىن قارجى تولەۋ مۇمكىندىگى قاراستىرىلماعانىن اتاپ ءوتتى. رەيتينگ تۋريستىك نىسانداردىڭ ساياحاتشىلار اراسىنداعى تانىمالدىعى مەن حالىقارالىق دەڭگەيدە مويىندالۋىن كورسەتەدى.
رەيتينگ قورىتىندىسى بويىنشا Worldworthy رەداكتسياسى شارىن مەملەكەتتىك ۇلتتىق تابيعي پاركىنە ارنايى سەرتيفيكات جولداعان. ال 11 قاراشادا قازاقستاننىڭ ورمان شارۋاشىلىعى جانە جانۋارلار دۇنيەسى كوميتەتى شاتقالدىڭ الەمدەگى ۇزدىك 20 نىساننىڭ قاتارىنا ەنگەنىن حابارلادى.
شارىن شاتقالى ەرەكشە گەولوگيالىق قۇرىلىمدارىمەن، الىپ جارتاستارىمەن جانە كوركەم تابيعاتىمەن تانىمال. ونىڭ ەڭ كورنەكتى بولىكتەرىنىڭ ءبىرى – بيىك جارتاستاردان قۇرالعان «قامالدار اڭعارى». الماتى وبلىسىندا ورنالاسقان بۇل تابيعي نىسان ەلىمىزدەگى تانىمال تۋريستىك باعىتتاردىڭ ءبىرى سانالادى.
