قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ توراعالىعىمەن وتكەن ۇكىمەتتىڭ كەڭەيتىلگەن وتىرىسىندا پرەمەر-مينيستر ولجاس بەكتەنوۆ ەكونوميكانىڭ تۇراقتى دامۋىن قامتاماسىز ەتۋ بويىنشا اتقارىلىپ جاتقان جۇمىستار تۋرالى باياندادى، دەپ حابارلايدى "ادىرنا" ۇلتتىق پورتالى.
پرەمەر-ءمينيستردىڭ ايتۋىنشا، مەملەكەت باسشىسىنىڭ ەل ەكونوميكاسىن نىعايتۋ جونىندەگى تاپسىرمالارى مەن قازاقستان حالقىنا جولداۋىندا ايقىندالعان ستراتەگيالىق ماقساتتارعا سايكەس ۇكىمەت 2025 جىلى جۇيەلى وزگەرىستەرگە باعىتتالعان بىرقاتار شارا قابىلداعان.
سالىق، تاريف جانە بيۋدجەت ساياساتىنا، سونداي-اق تسيفرلىق، قۇرىلىس جانە الەۋمەتتىك سالالارعا قاتىستى شەشىمدەر ەكونوميكانىڭ دامۋىنا كەدەرگى كەلتىرىپ وتىرعان قۇرىلىمدىق تەڭگەرىمسىزدىكتەردى جويۋعا باعىتتالعان.
ولجاس بەكتەنوۆ سالىق جانە بيۋدجەت رەفورمالارى ۇلتتىق قوردان نىسانالى ترانسفەرتتەردى تارتپاي-اق، ءۇش جىلدىق بيۋدجەتتى قالىپتاستىرۋعا مۇمكىندىك بەرگەنىن اتاپ ءوتتى.
بۇل 2028 جىلعا قاراي بيۋدجەت تاپشىلىعىن جالپى ىشكى ءونىمنىڭ 0,9 پايىزىنا دەيىن قىسقارتۋعا جاعداي جاساعان.
باياندامادا ايتىلعانداي، جەرگىلىكتى بيۋدجەتتەردىڭ رەسپۋبليكالىق بيۋدجەتكە تاۋەلدىلىگى 2025 جىلعى 50 پايىزدان 2028 جىلى 34 پايىزعا دەيىن تومەندەيدى.
ءوز ماماندىعى زاڭگەر ولجاس بەكتەنوۆ 2024 جىلى 6 اقپاندا پرەمەر-مينيستر بولىپ تاعايىندالعان ەدى. ول ۇكىمەتكە پرەزيدەنت اكىمشىلىگىنەن كەلدى.
