يلحام اليەۆ ازەربايجاننىڭ كيەۆتەگى ەلشىلىگىنە جاسالعان سوققىلاردى رەسەي تاراپىنان جاسالعان دوستىققا جات ارەكەت دەپ باعالادى، دەپ حابارلايدى "ادىرنا" ۇلتتىق پورتالى caliber.az-عا سىلتەپ.
بۇل تۋرالى ول ميۋنحەن قاۋىپسىزدىك كونفەرەنتسياسى اياسىنداعى پانەلدىك تالقىلاۋدا مالىمدەدى.
پرەزيدەنتتىڭ ايتۋىنشا، ۋكرايناداعى سوققىلار تەك ەنەرگەتيكالىق ينفراقۇرىلىمعا عانا ەمەس، ازەربايجاننىڭ ديپلوماتيالىق وكىلدىگىنە دە باعىتتالعان. ونىڭ سوزىنشە، كيەۆتەگى ەلشىلىك ءۇش رەت شابۋىلعا ۇشىراعان.
اليەۆ العاشقى شابۋىلدى كەزدەيسوق جاعداي بولۋى مۇمكىن دەپ باعالاعانىن ايتتى. كەيىن ازەربايجان تاراپى رەسەيگە ءوز ديپلوماتيالىق نىساندارىنىڭ — كونسۋلدىق ءبولىم، مادەني ورتالىق جانە ەلشىلىك كوورديناتتارىن بەرگەن. سوعان قاراماستان تاعى ەكى سوققى جاسالعان.
يلحام اليەۆ ميۋنحەن قالاسىندا وتكەن حالىقارالىق قاۋىپسىزدىك فورۋمىندا ازەربايجان ەلىنىڭ ۋكراينا اۋماعىنداعى ديپلوماتيالىق وكىلدىگىنە جاسالعان شابۋىلدارعا قاتىستى رەسەي ەلشىسىنە رەسمي نارازىلىق نوتاسىن تابىستاعانىن دا حابارلادى.
سونداي-اق، فورۋم اياسىندا ۆلاديمير زەلەنسكي مەن يلحام اليەۆ ەكىجاقتى كەزدەسۋ وتكىزدى. كەزدەسۋ بارىسىندا ەنەرگەتيكا سالاسىنداعى ىنتىماقتاستىق، گۋمانيتارلىق كومەك جانە ەكى ەل اراسىنداعى سەرىكتەستىكتى كەڭەيتۋ ماسەلەلەرى تالقىلاندى. ۋكراينا باسشىسى ازەربايجاننىڭ ەنەرگەتيكالىق قولداۋى ءۇشىن العىس ءبىلدىردى.
ساراپشىلاردىڭ پىكىرىنشە، بۇل كەزدەسۋلەر كاسپي وڭىرىندەگى ەنەرگەتيكالىق جانە ترانزيتتىك ىنتىماقتاستىقتى نىعايتۋعا ىقپال ەتۋى مۇمكىن. سونىمەن قاتار، قاۋىپسىزدىك فورۋمىندا ايماقتىق تۇراقتىلىق پەن حالىقارالىق قاۋىپسىزدىك ماسەلەلەرى كەڭىنەن تالقىلاندى.
