فوتو:Reuters
ازەربايجان پرەزيدەنتى يلحام اليەۆتىڭ ازەربايجاننىڭ كيەۆتەگى ەلشىلىگىنە ادەيى سوققى جاسالدى دەگەن مالىمدەمەسى شىندىققا سايكەس كەلمەيدى. بۇل تۋرالى رەسەي سىرتقى ىستەر مينيسترلىگىنىڭ ءباسپاسوز قىزمەتى ربك باسىلىمىنا بەرگەن تۇسىندىرمەسىندە ايتتى، دەپ حابارلايدى “ادىرنا”.
«ازەربايجاننىڭ كيەۆتەگى ديپلوماتيالىق ميسسياسىنىڭ عيماراتتار كەشەنىنە كەلتىرىلگەن زاقىم، ەڭ ىقتيمال نۇسقا بويىنشا، ۋكراينا قارۋلى كۇشتەرىنىڭ اۋە قورعانىسى قۇرالدارىنىڭ دۇرىس جۇمىس ىستەمەۋىنىڭ سالدارىنان بولعان»، – دەلىنگەن ۆەدومستۆو مالىمدەمەسىندە.
رەسەي ءسىم ديپلوماتيالىق ميسسيا عيماراتتارىنىڭ زاقىمدانۋىنا بايلانىستى شىنايى وكىنىش بىلدىرگەنىن اتاپ ءوتتى.
رەسەي تاراپى ازەربايجانعا ەلدىڭ قارۋلى كۇشتەرى «زاڭدى اسكەري نىساندارعا» سوققى جاساپ جاتقانىن جەتكىزگەن. اڭگىمە ۋكراينا قورعانىس-ونەركاسىپ كەشەنىنە تيەسىلى نىساندار تۋرالى بولىپ وتىر، ولاردىڭ بىرقاتارى كيەۆ قالاسىندا ورنالاسقان.
بۇعان دەيىن يلحام اليەۆ ميۋنحەن قاۋىپسىزدىك كونفەرەنتسياسىندا كيەۆتەگى ازەربايجان ەلشىلىگىنە ءۇش رەت سوققى جاسالعانىن مالىمدەپ رەسەيدى ايىپتاعان ەدى.
ول ازەربايجاننىڭ كيەۆتەگى ەلشىلىگىنە جاسالعان سوققىلاردى رەسەي تاراپىنان جاسالعان دوستىققا جات ارەكەت دەپ باعالاعان.
