فوتو: قورعانىس مينيسترلىگىنىڭ ءباسپاسوز قىزمەتى
قازاقستان الداعى كۇندەرى رەسەيگە اسكەري تەحنيكا مەن ساربازدارىن جىبەرەدى. بۇل تۋرالى قورعانىس مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى قازتاگ اگەنتتىگىنە سىلتەپ.
«24 قىركۇيەك پەن 3 قازان ارالىعىندا رەسەي فەدەراتسياسىنىڭ اۋماعىندا ۇقشۇ-نىڭ ء«وزارا ءىس-قيمىل – 2026»، «ىزدەۋ – 2026» جانە «ەشەلون – 2026» وقۋ-جاتتىعۋلارىن وتكىزۋ جوسپارلانعان. وقۋ-جاتتىعۋلاردى دايىنداۋ جانە وتكىزۋ اياسىندا 21 قىركۇيەك پەن 5 قازان ارالىعىندا اسكەري تەحنيكا مەن جەكە قۇرامدى تەمىرجول كولىگىمەن قازاقستان رەسپۋبليكاسىنىڭ اۋماعى ارقىلى رەسەيدىڭ چەليابى وبلىسىنداعى ميسياشش ستانتسياسىنا دەيىن جانە كەرى قاراي جوسپارلى تۇردە تاسىمالداۋ جۇزەگە اسىرىلادى»، – دەپ حابارلادى دۇيسەنبى كۇنى قازاقستان رەسپۋبليكاسى قورعانىس مينيسترلىگىنىڭ ءباسپاسوز قىزمەتى.
مينيسترلىكتىڭ مالىمەتىنشە، وقۋ-جاتتىعۋلار بارىسىندا دالالىق ساباقتار وتكىزىلىپ، اسكەرلەردى قايتا توپتاستىرۋ، بولىمشەلەردى باسقارۋ جانە قويىلعان مىندەتتەردى ورىنداۋ ماسەلەلەرى پىسىقتالادى.
ء«ىس-شارالار ۇقشۇ-عا مۇشە مەملەكەتتەردىڭ جاۋىنگەرلىك دايارلىعىنىڭ بەكىتىلگەن جوسپارلارىنا سايكەس جۇرگىزىلەدى. ء«وزارا ءىس-قيمىل – 2026»، «ىزدەۋ – 2026» جانە «ەشەلون – 2026» وقۋ-جاتتىعۋلارى تۇراقتى نەگىزدە وتكىزىلىپ، ۇيىمعا مۇشە مەملەكەتتەردىڭ اۋماعىندا كەزەكتەسىپ ۇيىمداستىرىلادى»، – دەپ تولىقتىردى قورعانىس مينيسترلىگى.
