باكۋدەن ارنايى كابەل توسەۋشى كەمە شىعىپ، كاسپي تەڭىزىنىڭ تۇبىمەن بايلانىس جەلىسىن توسەۋدى باستادى، دەپ حابارلايدى "ادىرنا" ءتىلشىسى.
بۇل تۋرالى قازاقستاننىڭ جاساندى ينتەللەكت جانە تسيفرلىق دامۋ مينيسترلىگى مالىمدەدى.
مينيسترلىكتىڭ مالىمەتىنشە، اۋا رايى قولايلى بولعان جاعدايدا سۋاستى كابەلىن توسەۋ جۇمىستارى 15–20 كۇن ىشىندە اياقتالادى.
قىتايدا ءوندىرىلىپ، سىناقتان وتكەن بروندالعان وپتيكالىق كابەل الدىمەن قۇرىق پورتىنا جەتكىزىلىپ، كەيىن باكۋ قالاسىنا تاسىمالدانعان. قازىرگى ۋاقىتتا كابەل تولىقتاي ارنايى كابەل توسەۋشى كەمەنىڭ رەزەرۆۋارىنا تيەلگەن.
جوبا اياسىنداعى جۇمىستارعا سۋ سىيىمدىلىعى 20 مىڭ توننادان اساتىن، ديناميكالىق پوزيتسيالاۋ جۇيەسىمەن جابدىقتالعان ارنايى كەمە تارتىلعان. كەمە بورتىندا 70 ەكيپاج مۇشەسى، تەحنيكالىق قاداعالاۋ ماماندارى جانە «قازاقتەلەكوم» اق وكىلى جۇمىس ىستەۋدە.
ترانسكاسپيلىك بايلانىس جەلىسى «قازاقتەلەكوم» اق مەن ازەربايجاننىڭ AzerTelecom International كومپانياسى بىرلەسىپ قۇرعان CaspiLink B.V. كاسىپورنى ارقىلى جۇزەگە اسىرىلۋدا. قازىرگى ۋاقىتتا قازاقستان مەن ازەربايجان جاعىنداعى كابەل ۋچاسكەلەرى ءوزارا جالعانىپ، بارلىق وپتيكالىق جەلىلەر سىناقتان ءساتتى وتكەن.
