كۇنى كەشە رەسەي پرەزيدەنتى ۆ. پۋتين ۋكراينانىڭ دنر، لنر، زاپوروجە جانە حەرسون ايماقتارىن قوسىپ العانىن حابارلادى. قوعامدىق پىكىر جەتەكشىسى، جۋرناليست وڭعار قابدەن اينالامىزدا بولىپ جاتقان وسىنداي ساياسي قايشىلىقتارعا باعا بەرىپ، قازىرگى قازاقستان مۇددەسى جايلى ءسوز ەتتى، دەپ حابارلايدى "ادىرنا" ۇلتتىق پورتالى.
“حەرسون، لۋگانسك جانە دونەتسك، زاپوروجە ءوز تاڭداۋىن جاسادى. بۇل ايماقتار رەسەيگە قوسىلۋدى تاڭداپ وتىر. ءبىز ادامداردىڭ تاڭداۋىنا قۇرمەتپەن قارايمىز جانە قابىلدايمىز. دەرەۋ ارادا كيەۆ اسكەري قيمىلدى توقتاتىپ، كەلىسسوزگە كەلسىن. ءبىز كەلىسسوز وتكىزۋگە دايىنبىز” دەدى شىمىرىكپەستەن. مەن سولتۇستىك كورشىنىڭ قادامدارىنان قورقايىن دەدىم. ءبىرى ۋكراينا ءبىرى رەسەيدى جاقتاپ ءوز-وزىمىزبەن قىرىلىسىپ وتىرىسىمىز مىناۋ. بىزگە شۇعىل ارادا ۇلتتىق يدەولوگيانى ءتۇزۋ كەرەك. ۇلت بولىپ ۇيىسپاساق مىنا رەفەرەندۋم بولاشاقتا ءبىزدىڭ جەردە وتەدى، - دەپ جازدى جۋرناليست.
وسىنداي ساياسي بۇلعاقتار داۋىرىندە ۇلتتىق بىرلىك، ۇلتتىق مۇددە مەن قازاق اراسىنداعى اۋىزبىرشىلىكتى كۇشەيتۋ ءۇشىن ۇلتتىق يدەولويگيا قاجەت ەكەنىن ەسكەرتكەن جۋرناليست قازاقتىڭ باسقارۋشىلىق قۇرىلىمدارىن جەتىلدىرىپ، بەرەكەلى جۇرتقا اينالۋ جايىن ەرەكشە اتاپ ءوتتى.
"باس باسىنا بي بولعان وڭكەي قيقىم، مىنەكەي بۇزعان جوق پا ەلدىڭ سيقىن" دەگەن ابايدىڭ ءسوزىن قاپەردە ۇستايىق. قازىردىڭ وزىندە ومار جالەل دەگەن ءبيىمىز بار. ەرتەڭ شىعىستىڭ ءوز ءبيى، باتىستىڭ ءوز ءبيى بولسا. سوسىن، حان سايلاپ الساق. مەملەكەتتىك قۇرىلىم قايدا قالادى؟ اتىراۋ مەن التاي اراسىن جايلاعان قالىڭ قازاقتى ءبىر ماقساتقا، ءبىر مۇددەگە جۇمىلدىرىپ، بەرەكەنىڭ بايراعىن جەلبىرەتكەن بەرەكەلى جۇرت بولۋىمىز كەرەك. التىباقان الاۋىزدىعىمىزدى كىم پايدالانبادى؟ ساۋساقتىڭ ءوزى بىرىكسە عانا جۇدىرىق بولادى", - دەدى اۆتور.
ءجۋرناليستىڭ ويماقتاي ويىنا: "نە دە بولسا رەسەيدىڭ اسىعى تۇگەندەلىپ كەلە جاتىرعان سياقتى. بۇل اگرەسسورلىق ساياسات ارتى جاقسىلىققا اپارمايدى. دەگەنمەن بارىنە دايىن بولۋىمىز كەرەك سياقتى. ءوزىمىزدىڭ اۋىزىمىز ءبىر بولۋى كەرەك. ونى ادەمىلەپ ۇيىستىراتىن ءبىر باسشى كەرەك", "ۇلتتىق يدەولوگيا دەيسىڭ-اۋ. سولتۇستىك پەن ورتالىق ايماقتار تۇگەل ورىستانىپ بولدى. اكىمدەرى تاناۋىنىڭ استىنداعىن كورمەيدى" دەپ پىكىر ءبىلدىردى وقىرماندار.
