ىستىقكولدە وتكەن ورتالىق ازيا مەملەكەتتەرى مەن ازەربايجان پرەزيدەنتتەرىنىڭ بەيرەسمي ءسامميتىنىڭ قورىتىندىسى بويىنشا مەملەكەت باسشىلارى شولپان-اتا دەكلاراتسياسىنا قول قويدى،، دەپ حابارلايدى "ادىرنا" ءتىلشىسى.
قىرعىزستان پرەزيدەنتىنىڭ ءباسپاسوز قىزمەتىنىڭ مالىمەتىنشە، قۇجاتقا قىرعىزستان، قازاقستان، ازەربايجان، تاجىكستان، تۇركىمەنستان جانە وزبەكستان باسشىلارى قول قويعان.
قىرعىزستان پرەزيدەنتى سادىر جاپاروۆتىڭ ايتۋىنشا، دەكلاراتسيا ورتالىق ازيا ەلدەرى مەن ازەربايجان اراسىنداعى جوعارى دەڭگەيدەگى ءوزارا سەنىمدى، بەيبىتشىلىك، تاتۋ كورشىلىك جانە ورنىقتى دامۋ قاعيداتتارىنا ادالدىقتى، وڭىرلىك ىنتىماقتاستىقتى ودان ءارى نىعايتۋعا دەگەن ۇمتىلىستى كورسەتەدى.
سامميت بارىسىندا مەملەكەت باسشىلارى ساۋدا-ەكونوميكالىق بايلانىستاردى دامىتۋ، ەنەرگەتيكا، تۋريزم، كولىك دالىزدەرى، مادەني-گۋمانيتارلىق ىنتىماقتاستىق جانە وڭىرلىك قاۋىپسىزدىك ماسەلەلەرىن تالقىلادى.
كەزدەسۋدە سادىر جاپاروۆ «قىتاي – قىرعىزستان – وزبەكستان» تەمىرجولىنىڭ قۇرىلىسى مەن قازاقستان جانە وزبەكستانمەن بىرلەسىپ جۇزەگە اسىرىلىپ جاتقان قامبار اتا گەس-1 جوباسىنىڭ ستراتەگيالىق ماڭىزىن اتاپ ءوتتى. سونىمەن قاتار ول شەتەلدىك تۋريستەرگە ارنالعان بىرىڭعاي ورتالىق ازيا تۋريستىك ۆيزاسىن ەنگىزۋ باستاماسىن ەسكە سالىپ، بۇل ۇسىنىستى قازاقستان مەن وزبەكستان قولداعانىن ايتتى.
