وزبەكستاننىڭ اۆتاكولىك شىعاراتىن UzAuto Motors كومپانياسى ەلدىڭ ىشكى نارىعىنا 2024 جىلى شىعارۋ جوسپارلانعان Chevrolet Cobalt, Damas جانە Labo اۆتوكولىكتەرىنىڭ كولەمىنە كەلىسىمشارتتى ەكى كۇندە اياقتادى، دەپ حابارلايدى “ادىرنا” ۇلتتىق پورتالى.
كومپانيا مالىمەت ەتكەندەي، 25 جانە 26 جەلتوقساندا ساتىپ الۋشىلارمەن اۆتوكولىكتەردى كەلەسى جىلى جەتكىزۋگە 171,2 مىڭ كەلىسىمشارت جاسالعان. كەلىسىمدەر ونلاين قوسىمشالار ارقىلى جاسالعان.
كومپانيا وكىلدەرى ونلاين ساتۋ كەزىندە كيبەرشابۋىلدار كەسىرىنەن تەحنيكالىق اقاۋ تۋىنداپ وتىرعانىن دا جاسىرمادى.
«UzAutoSavdo ونلاين ساۋدا جۇيەسىندە 7 مىڭ كيبەرشابۋىل باقىلاندى. وسى كەزەڭدە جۇيەدە بارلىعى 3 ملن-نان استام بەلسەندى سەانس تىركەلگەن. كومپانيانىڭ كولل-ورتالىعى 3 مىڭنان استام ءوتىنىمدى قابىلداپ، وڭدەدى»، دەپ حابارلادى UzAuto Motors كومپانياسى.
ايتا كەتەيىك، بۇعان دەيىن وزبەكستان ۇكىمەتى «الىپساتارلارمەن» كۇرەسۋ جانە بارلىق تۇتىنۋشىلارعا تەڭ مۇمكىندىكتەر جاساۋ ماقساتىندا جاڭا كولىكتەردى ساتۋ ەرەجەلەرىنە وزگەرىستەر ەنگىزدى.
جاڭا ەرەجەلەرگە سايكەس، 12 اي ىشىندە ەكىدەن استام ساتىپ الۋ-ساتۋ شارتىن جاساسقان كليەنتپەن ماشينانى جەتكىزۋگە جاڭا كەلىسىم-شارت جاسالمايدى.
