ءورت دابىلى، جىلۋ-ءتۇتىن كامەراسى، بيىكتەن قۇتقارۋ جانە جول-كولىك وقيعاسىنان كەيىن زارداپ شەككەن ادامدى كولىكتەن شىعارۋ — «قۇقىق ءتارتىبى الىپپەسى» اكتسياسىنىڭ قاتىسۋشىلارى تەك قۇتقارۋشىلاردىڭ جۇمىسىمەن تانىسىپ قانا قويماي، ونى ءىس جۇزىندە كوردى. قاراعاندى وبلىسى توتەنشە جاعدايلار دەپارتامەنتىنە ۇيىمداستىرىلعان ەكسكۋرسيا قوناقتارعا ازاماتتىق قورعاۋ قىزمەتىنىڭ كۇندەلىكتى ءومىرى مەن جۇمىس ەرەكشەلىكتەرىن تولىق تۇسىنۋگە مۇمكىندىك بەردى.
اكتسيا «زاڭ جانە ءتارتىپ» يدەولوگيالىق تاقىرىبى اياسىندا وتكىزىلدى جانە قاراعاندى وبلىسى پروكۋراتۋراسىنىڭ جوبالىق كەڭسەسىنىڭ جۇيەلى جۇمىسىنىڭ ءبىر بولىگى رەتىندە ۇيىمداستىرىلدى. ونىڭ نەگىزگى ماقساتى — مەملەكەتتىك ورگانداردىڭ اشىقتىعىن ارتتىرۋ، زاڭدىلىق پرينتسيپتەرىن ءىس جۇزىندە كورسەتۋ جانە قوعاممەن تىكەلەي ديالوگ ورناتۋ.
ءىس-شاراعا پروكۋراتۋرا، اكىمدىك، دەپۋتاتتار، قوعامدىق ۇيىمدار جانە ستۋدەنتتەر قاتىستى.
— ءبىزدىڭ مىندەتىمىز — قۇتقارۋشىلاردىڭ كۇندەلىكتى قىزمەتىن بارىنشا جان-جاقتى كورسەتۋ: ولار قانداي شاقىرۋلارعا جاۋاپ بەرەدى، قانداي تەحنيكا پايدالانادى جانە توتەنشە جاعدايلاردا قالاي شەشىم قابىلدايدى. مۇنداي فورمات ازاماتتىق قورعاۋ قىزمەتىنىڭ ناقتى جۇمىسىن ءوز كوزىمىزبەن كورۋگە مۇمكىندىك بەرەدى، — دەدى تجد ورىنباسارى، ازاماتتىق قورعاۋ پودپولكوۆنيگى دۋمان دالەشوۆ.
باعدارلاما مامانداندىرىلعان №1 ءورت بولىمشەسىنەن باستالدى. قوناقتارعا اقپاراتتى جيناۋ، وڭدەۋ جانە بەرۋ، سونداي-اق بولىمشەلەردىڭ توتەنشە جاعدايلار كەزىندە ارەكەت ەتۋ ءتارتىبى كورسەتىلدى.
كەيىن قاتىسۋشىلار قىزمەت مۇراجايىن ارالاپ، ازاماتتىق قورعاۋ بولىمشەلەرىنىڭ تاريحىمەن تانىستى.
ەرەكشە قىزىعۋشىلىق تاجىريبەلىك بولىمدە ارتتى. قاتىسۋشىلارعا ءورت سوندىرۋشىلەردىڭ دايىندىقتان وتەتىن جىلۋ-ءتۇتىن كامەراسى، عيماراتتىڭ جوعارعى قاباتىنان زارداپ شەككەن ادامدى قۇتقارۋ، كينولوگيالىق توپتىڭ قاتىسۋىمەن ورماندا شارتتى زارداپ شەككەندى ىزدەۋ، سۋ استى مامانىنىڭ قىسقى ءتۇسىرىلىسى، جول-كولىك وقيعاسىنان كەيىن كولىكتەن ادامدى شىعارۋ، سونداي-اق گيدراۆليكالىق جانە اۆاريالىق-قۇتقارۋ قۇرالدارىنىڭ مۇمكىندىكتەرى كورسەتىلدى.
مۇنداي ءىس-شارالار دەپارتامەنتتە تۇراقتى تۇردە وتكىزىلىپ تۇرادى، بىراق پروكۋراتۋرامەن بىرلەسىپ ۇيىمداستىرىلعان بۇل فورمات العاش رەت بولدى.
اكتسيانىڭ باستى ماقساتى — تۇرعىنداردى قۇتقارۋ قىزمەتىنىڭ جۇمىسى تۋرالى جان-جاقتى حاباردار ەتۋ، قۇقىقتىق مادەنيەتتى دامىتۋ جانە مەملەكەتتىك ورگاندار مەن قوعام اراسىنداعى سەنىمدى نىعايتۋ.
