قاراعاندى وبلىسىندا ينۆەستورلار ناقتى قۇقىقتىق قولداۋ مەن ءوز مۇددەلەرىنىڭ قورعالۋىنا سەنىم ارتا الادى. وتكەن جىلدىڭ سوڭىندا مەملەكەت باسشىسىنىڭ باستاماسىمەن باس پروكۋراتۋرا جانىنان ينۆەستورلاردىڭ قۇقىقتارىن قورعاۋ كوميتەتى قۇرىلدى. بۇل — بيزنەسپەن ءوزارا ءىس-قيمىلدىڭ جاڭا فورماتى، ول ماسەلەلەردى جەدەل شەشۋگە جانە اكىمشىلىك كەدەرگىلەردى جويۋعا مۇمكىندىك بەرەدى.
ءار وڭىردە وبلىس پروكۋرورلارى ينۆەستيتسيالىق پروكۋرورلاردىڭ فۋنكتسيالارىن اتقارادى. سونىمەن قاتار ينۆەستيتسيالىق جوبالاردى سۇيەمەلدەيتىن جانە بيزنەس تۋىنداعان ماسەلەلەردى شەشۋگە جاردەمدەسەتىن جۇمىس توپتارى قۇرىلعان. ينۆەستورلارمەن جۇمىس ىستەۋدىڭ جاڭا قۇرالدارى مەن قولداۋدىڭ ناقتى تەتىكتەرى بيزنەس وكىلدەرىمەن وتكەن كەزدەسۋدە تالقىلاندى.
— مەملەكەت باسشىسى ينۆەستورلاردىڭ قۇقىقتارىن قورعاۋدى جوعارى دەڭگەيگە قويىپ وتىر. ءبىزدىڭ مىندەتىمىز — وبلىستى ينۆەستورلار ءبىر جوبامەن عانا ەمەس، ۇزاق مەرزىمگە كەلەتىن مۇمكىندىكتەر ايماعىنا اينالدىرۋ. ءبىز ءوڭىردىڭ بيزنەس ءۇشىن سەنىمدى ءارى بولجامدى ايماق رەتىندەگى ءيميدجىن نىعايتۋعا جانە جان-جاقتى قولداۋ كورسەتۋگە دايىنبىز، — دەدى وبلىس اكىمى ەرماعانبەت بولەكپاەۆ.
ونىڭ ايتۋىنشا، ينۆەستورلارمەن جۇمىس ءۇش نەگىزگى قاعيداتقا نەگىزدەلەدى: اشىقتىق، زاڭدىلىق جانە ارىپتەستىك. ءاربىر ينۆەستور قايدا جۇگىنۋ كەرەكتىگىن، كومەكتى قايدان الاتىنىن جانە ماسەلەسىنىڭ قانشالىقتى جەدەل شەشىلەتىنىن ناقتى ءبىلۋى ءتيىس — ارتىق توسقاۋىلدار مەن بيۋروكراتيالىق كىدىرىستەرسىز.
بۇل قاعيداتتاردىڭ ساقتالۋىنا پروكۋراتۋرا كەپىل بولادى. وڭىردە ينۆەستيتسيالىق جوبالاردى بارلىق كەزەڭدە سۇيەمەلدەپ، ولاردىڭ ءىس جۇزىندە جۇزەگە اسىرىلۋىنا ىقپال ەتەتىن جۇمىس توبى جۇمىس ىستەيدى.
— ورتاق ماقساتىمىز — تۇراقتى ءارى قولايلى ينۆەستيتسيالىق احۋال قالىپتاستىرۋ. ينۆەستور زاڭ مەن مەملەكەتكە سەنگەن جاعدايدا عانا بۇل مۇمكىن بولادى. پروكۋراتۋرا بيزنەسكە بارلىق ماسەلەلەر بويىنشا قولداۋ كورسەتۋگە ءازىر، — دەپ اتاپ ءوتتى وبلىس پروكۋرورى باۋىرجان مىرزاكەروۆ.
وبلىستا «پروكۋرورلىق سۇزگى» تەتىگى ەنگىزىلگەن. ول ينۆەستورلارعا قاتىستى مەملەكەتتىك ورگانداردىڭ شەشىمدەرىن پروكۋرورمەن مىندەتتى تۇردە كەلىسۋدى كوزدەيدى. وسى جۇيەنىڭ ناتيجەسىندە نەگىزسىز 23 تەكسەرۋ كەرى قايتارىلىپ، 88 جاعدايدا ينۆەستورلاردى اكىمشىلىك جاۋاپكەرشىلىككە تارتۋعا جول بەرىلمەدى، سونداي-اق جوبالاردى سۇيەمەلدەۋ بارىسىندا 65 پروبلەمالىق ماسەلە شەشىمىن تاپتى.
«SILK ROAD ELECTRONIC» جشس ديرەكتورى الەكساندر كريتسكي قاداعالاۋ ورگانىمەن ءوزارا ءىس-قيمىلدىڭ جوعارى تيىمدىلىگىن اتاپ ءوتتى.
— ءبىزدىڭ تاجىريبەمىزدە پروكۋراتۋرا تۋىنداعان جاعدايعا جەدەل ارەكەت ەتىپ، زاڭدىلىقتىڭ ساقتالۋىن قالپىنا كەلتىرۋگە ىقپال ەتكەن تابىستى كەيس بار. ءپرينتسيپشىل ءارى سىندارلى ۇستانىمنىڭ ناتيجەسىندە ماسەلە قۇقىقتىق الاڭدا جانە قىسقا مەرزىم ىشىندە شەشىمىن تاپتى. مۇنداي ءوزارا ءىس-قيمىل فورماتى كاسىپكەرلەرگە اكىمشىلىك كەدەرگىلەرگە الاڭداماي، ءوندىرىستى دامىتۋعا جانە جاڭا جۇمىس ورىندارىن قۇرۋعا نازار اۋدارۋعا مۇمكىندىك بەرەدى، — دەپ اتاپ ءوتتى الەكساندر كريتسكي.
وڭىردە ء«بىر تەرەزە» قاعيداتى مەن ينۆەستيتسيالىق شتاب جۇمىس ىستەيدى. جاڭا ينۆەستيتسيالىق ستراتەگيا قابىلدانىپ، وعان سايكەس قالالار مەن اۋدانداردىڭ اكىمدەرى ينۆەستيتسيالىق جوبالاردىڭ ىسكە اسىرىلۋىنا جەكە جاۋاپتى بولىپ بەلگىلەندى.
