بالقاشتا Balkhash Tour Fest-2026 فەستيۆالى مەن حالىقارالىق ۆولونتيورلەر جىلىنا وراي ۇيىمداستىرىلعان حالىقارالىق ەرىكتىلەر فورۋمى وتۋدە.
بالقاش كولىنىڭ جاعالاۋىنداعى اۋقىمدى ءىس-شارا قازاقستان، تۇركيا، ءۇندىستان، ازەربايجان، قىرعىزستان، تۇرىكمەنستان جانە وزبەكستاننان كەلگەن جاستاردىڭ باسىن قوستى.
كول جاعالاۋىندا بالقاش ءوڭىرىنىڭ بىرەگەي تابيعاتىن بەينەلەيتىن جاڭا كورنەكى نىسان – «بالقاش جولبارىستارى» پايدا بولدى. مۇسىندىك كومپوزيتسيا ءبىر كەزدەرى بالقاش ماڭىن مەكەندەگەن تۇران جولبارىسىن ەسكە سالادى.
جىرتقىشتىڭ پوپۋلياتسياسىن قايتا قالپىنا كەلتىرۋ ماقساتىندا حالىقارالىق باعدارلاما شامامەن ون جىلدان بەرى جۇزەگە اسىرىلىپ كەلەدى.
فورۋم قاتىسۋشىلارىمەن قاراعاندى وبلىسىنىڭ اكىمى ەرماعانبەت بولەكپاەۆ كەزدەسىپ، بەيرەسمي جاعدايدا پىكىر الماستى.
– بۇل حالىقارالىق فورۋم ىنتىماقتاستىقتى نىعايتۋعا، تۇراقتى دامۋعا جانە بۇكىل الەم ءۇشىن قۇندى سانالاتىن تابيعي مۇرانى ساقتاۋعا دەگەن ورتاق ۇستانىمىمىزدى ايقىن كورسەتەدى. كەزدەسۋدىڭ ماڭىزىن «تازا قازاقستان» جالپىۇلتتىق باستاماسىمەن ساباقتاستىعى ودان ءارى ارتتىرا تۇسەدى. قاسىم-جومارت توقاەۆ بىرنەشە رەت اتاپ وتكەندەي، «تازا قازاقستان» – بۇل اۋماقتاردى ءبىر رەتتىك تازالاۋ ناۋقانى ەمەس، قورشاعان ورتاعا، قوعامدىق كەڭىستىكتەرگە جانە تۋعان جەرگە جاناشىرلىقپەن قاراۋعا نەگىزدەلگەن جاڭا مادەنيەت پەن ءومىر سالتىن قالىپتاستىرۋعا باعىتتالعان باستاما. قاراعاندى وبلىسى بۇل باعدارلاماعا بەلسەندى قاتىسۋدا. بۇگىنگى كۇنگە دەيىن 113 مىڭنان استام جاس پەن ءۆولونتيوردى قامتىعان 176 ەكولوگيالىق اكتسيا ۇيىمداستىرىلدى، – دەدى ءوڭىر باسشىسى.
فورۋم باعدارلاماسى مازمۇندى ءارى اۋقىمدى.
ەكولوگيالىق باستامالاردان بولەك، پىكىرتالاستار مەن تانىمدىق ينتەراكتيۆتى ءىس-شارالار ۇيىمداستىرىلادى.
قاتىسۋشىلار قورشاعان ورتانى قورعاۋ جانە تۇراقتى دامۋ سالاسىنداعى بىلگەن-تۇيگەندەرىمەن، تىڭ يدەيالارىمەن جانە ۇزدىك تاجىريبەلەرىمەن بولىسەدى.
– ءبىزدىڭ ەلىمىزدە ۆولونتەرلىك قوزعالىس جاقسى دامىعان. قازاقستاندا ءوتىپ جاتقان حالىقارالىق فورۋمعا العاش رەت قاتىسىپ وتىرمىز. ءوز تاجىريبەمىزبەن ءبولىسىپ، وزگە ەلدەردىڭ وزىق تاجىريبەسىن ۇيرەنگىمىز كەلەدى. مۇندا كوپتەگەن جاڭا دۇنيەلەرمەن تانىستىق. اسىرەسە تۇركيادان كەلگەن ەرىكتىلەردىڭ تاعام قالدىقتارىن كادەگە جاراتۋعا باعىتتالعان جوباسى قىزىعۋشىلىق تۋدىردى. مۇنداي كەزدەسۋلەردىڭ پايداسى زور ەكەنى ءسوزسىز، – دەيدى قىرعىزستان دەلەگاتسياسىنىڭ جەتەكشىسى نامىزبەك ءنۋردوولوت.
«تازا قازاقستان» ۇلتتىق جوباسى اياسىندا ەرىكتىلەر ەكولوگيالىق اكتسيالار وتكىزىپ جاتىر. ال ەرتەڭ ولار Tour Fest فەستيۆالى ءوتىپ جاتقان بالقاش كولىنىڭ جاعاجاي اۋماعىن تازالاپ، رەتكە كەلتىرەدى.
