Balqaşta Balkhash Tour Fest-2026 festivalı men Halyqaralyq volontiorler jylyna orai ūiymdastyrylǧan Halyqaralyq erıktıler forumy ötude.
Balqaş kölınıŋ jaǧalauyndaǧy auqymdy ıs-şara Qazaqstan, Türkiia, Ündıstan, Äzerbaijan, Qyrǧyzstan, Türıkmenstan jäne Özbekstannan kelgen jastardyŋ basyn qosty.
Köl jaǧalauynda Balqaş öŋırınıŋ bıregei tabiǧatyn beineleitın jaŋa körnekı nysan – «Balqaş jolbarystary» paida boldy. Müsındık kompozisiia bır kezderı Balqaş maŋyn mekendegen Tūran jolbarysyn eske salady.
Jyrtqyştyŋ populiasiiasyn qaita qalpyna keltıru maqsatynda halyqaralyq baǧdarlama şamamen on jyldan berı jüzege asyrylyp keledı.
Forum qatysuşylarymen Qaraǧandy oblysynyŋ äkımı Ermaǧanbet Bölekpaev kezdesıp, beiresmi jaǧdaida pıkır almasty.
– Būl halyqaralyq forum yntymaqtastyqty nyǧaituǧa, tūraqty damuǧa jäne bükıl älem üşın qūndy sanalatyn tabiǧi mūrany saqtauǧa degen ortaq ūstanymymyzdy aiqyn körsetedı. Kezdesudıŋ maŋyzyn «Taza Qazaqstan» jalpyūlttyq bastamasymen sabaqtastyǧy odan ärı arttyra tüsedı. Qasym-Jomart Toqaev bırneşe ret atap ötkendei, «Taza Qazaqstan» – būl aumaqtardy bır rettık tazalau nauqany emes, qorşaǧan ortaǧa, qoǧamdyq keŋıstıkterge jäne tuǧan jerge janaşyrlyqpen qarauǧa negızdelgen jaŋa mädeniet pen ömır saltyn qalyptastyruǧa baǧyttalǧan bastama. Qaraǧandy oblysy būl baǧdarlamaǧa belsendı qatysuda. Bügıngı künge deiın 113 myŋnan astam jas pen volontiordı qamtyǧan 176 ekologiialyq aksiia ūiymdastyryldy, – dedı öŋır basşysy.
Forum baǧdarlamasy mazmūndy ärı auqymdy.
Ekologiialyq bastamalardan bölek, pıkırtalastar men tanymdyq interaktivtı ıs-şaralar ūiymdastyrylady.
Qatysuşylar qorşaǧan ortany qorǧau jäne tūraqty damu salasyndaǧy bılgen-tüigenderımen, tyŋ ideialarymen jäne üzdık täjıribelerımen bölısedı.
– Bızdıŋ elımızde volonterlık qozǧalys jaqsy damyǧan. Qazaqstanda ötıp jatqan halyqaralyq forumǧa alǧaş ret qatysyp otyrmyz. Öz täjıribemızben bölısıp, özge elderdıŋ ozyq täjıribesın üirengımız keledı. Mūnda köptegen jaŋa dünielermen tanystyq. Äsırese Türkiiadan kelgen erıktılerdıŋ taǧam qaldyqtaryn kädege jaratuǧa baǧyttalǧan jobasy qyzyǧuşylyq tudyrdy. Mūndai kezdesulerdıŋ paidasy zor ekenı sözsız, – deidı Qyrǧyzstan delegasiiasynyŋ jetekşısı Namyzbek Nurdöölöt.
«Taza Qazaqstan» ūlttyq jobasy aiasynda erıktıler ekologiialyq aksiialar ötkızıp jatyr. Al erteŋ olar Tour Fest festivalı ötıp jatqan Balqaş kölınıŋ jaǧajai aumaǧyn tazalap, retke keltıredı.
