Foto: Qaraǧandy oblysynyŋ PD baspasöz qyzmetı
Qaraǧandy oblysynda esırtkı qylmysynyŋ aldyn aluǧa baǧyttalǧan auqymdy aksiia öttı. Bır mezette Qaraǧandy, Temırtau jäne Balqaş qalalarynda polisiia qyzmetkerlerı men erıktıler esırtkı zattaryn jarnamalaityn graffiti jazulardy öşırdı.
Aksiiany Qaraǧandy oblysy Polisiia departamentınıŋ Esırtkı qylmysyna qarsy ıs-qimyl basqarmasy ūiymdastyrdy. Bır künnıŋ ışınde üş qalada myŋnan astam zaŋsyz graffiti jazuy joiyldy. Is-şaraǧa 200-den astam adam qatysty.
Būl – esırtkı jarnamasynyŋ taraluyna jol bermeuge baǧyttalǧan jüielı jūmystyŋ bır bölıgı. Jyl basynan berı oblys aumaǧynda osyndai 92 reidtık ıs-şara ötkızılıp, 7 myŋnan astam graffiti jazuy öşırıldı.
Polisiia qyzmetkerlerı esırtkı jarnamalaityn jazulardy öşırıp qana qoimai, olardy qaldyruǧa qatysy bar adamdardy anyqtau boiynşa da jūmystar jürgızude.
– Bügıngı ıs-şaranyŋ negızgı maqsaty – esırtkı zattaryn jarnamalaityn jazulardy joiu jäne olardyŋ taraluyna jol bermeu. Būl jūmysqa erıktı jastardyŋ belsendı qatysyp otyrǧany quantady. Jyl basynan berı 92 reid ötkızılıp, 7 myŋnan astam graffiti jazuy öşırıldı. Sonymen qatar mūndai jazulardy salyp jatqan jerınen üş adam ūstaldy, – dedı Qaraǧandy oblysy PD Esırtkı qylmysyna qarsy ıs-qimyl basqarmasynyŋ bastyǧy Qaiyrjan Tokubaev.
Onyŋ aituynşa, graffiti jazularyn qaldyru faktılerı boiynşa qylmystyq jauapkerşılıkke tartylǧan azamattar da bar.
Mäselen, mamyr aiynda Balqaş qalasynda jürgızılgen reid barysynda esırtkı jarnamalaityn graffiti jazuyn salyp jatqan 37 jastaǧy qala tūrǧyny ūstaldy. Oǧan qatysty qylmystyq ıs qozǧalyp, sot ükımımen 1 jyl 6 aiǧa bas bostandyǧynan aiyryldy.
Polisiia departamentı esırtkı qylmysynyŋ aldyn alu baǧytyndaǧy jūmystardy tūraqty türde jalǧastyrady. Būl rette ışkı ıster organdarynyŋ negızgı mındetterınıŋ bırı – esırtkınıŋ zaŋsyz ainalymyna ǧana emes, ony nasihattau men taratuǧa yqpal etetın kez kelgen äreketke der kezınde tosqauyl qoiu.
«Zaŋ men tärtıp» qaǧidaty – qauıpsız ortany qalyptastyrudy jäne qūqyq būzuşylyqtyŋ aldyn aludy talap etedı. Osy baǧytta polisiia qyzmetkerlerı erıktılermen jäne qoǧam belsendılerımen bırlesıp, esırtkı jarnamalaityn jazulardy anyqtau, joiu jäne olardy qaldyrǧan adamdardy jauapkerşılıkke tartu jūmystaryn küşeitude.
Polisiia tūrǧyndardy qoǧamdyq oryndardaǧy kümändı jazularǧa beijai qaramauǧa jäne olar turaly dereu polisiiaǧa habarlauǧa şaqyrady.
