Qaraǧandy oblysynyŋ 15 myŋ studentı «Jastar – Zaŋ men tärtıptıŋ tıregı» forumyna qatysty. Olarǧa esırtkı saudasynan, internet-alaiaqtyqtan jäne dropperlıkten aqşa tappaq bolǧan öz qūrdastarynyŋ qylmystyq jauapkerşılıkke tartylǧan naqty oqiǧalary körsetıldı. Soŋǧy bes jylda Qazaqstanda osyndai qylmystar jasaǧany üşın 21 jasqa tolmaǧan 800 adam sottalǧan.
Forumnyŋ basty taqyryptarynyŋ bırı – qabyldaǧan şeşımderı üşın jauapkerşılık. Sonymen qatar studentterge qūqyqtyq sauattylyqty arttyru, esırtkı qylmystarynyŋ, alaiaqtyq pen kiberqylmystyŋ aldyn alu mäselelerı tüsındırıldı.
Qaraǧandy oblysynyŋ äkımı Ermaǧanbet Bölekpaev jastardyŋ qūqyqtyq sanasyn qalyptastyrudyŋ maŋyzdylyǧyna toqtaldy.
– Bügınde jastardyŋ közqarasy men mınez-qūlqynyŋ qalyptasuyna sifrlyq orta, äsırese äleumettık jelıler barǧan saiyn köbırek yqpal etıp keledı. Būǧan jasöspırımder airyqşa beiım: tez aqşa tabuǧa degen ūmtylys keide olardy öreskel qatelıkterge, tıptı qylmysqa deiın jeteleidı. Sondyqtan Memleket basşysy atap ötkendei, bızdıŋ mındetımız – jas ūrpaqpen jauapkerşılık, adaldyq jäne zaŋdy qūrmetteu turaly olar tüsınetın tılde ärı zamanaui formatta söilesu, – dedı Ermaǧanbet Bölekpaev.
Qylmystyŋ internet keŋıstıgıne barǧan saiyn belsendı türde auysuy turaly oblys prokurory Mūrat Tıleuberdiev te aitty. Onyŋ sözınşe, qūqyq qorǧau organdaryna mūndai qylmystarmen küresudıŋ jaŋa täsılderın meŋgerıp, jūmys ädısterın jetıldıruge tura keledı. Al jas mamandar būl ıske tyŋ ideialar men jaŋa közqaras äkele alady.
– Qylmystyq orta ǧylymi-tehnikalyq progrestıŋ jetıstıkterın öz maqsatyna paidalanyp otyr. Alaiaqtyq jasau, esırtkı satu siiaqty qylmystar internet keŋıstıgıne auysty. Qūqyq qorǧau organdary öz jūmysyn qaita qarap, qylmystardy aşudyŋ jaŋa ädısterın äzırlep jatyr. Būl rette tyŋ közqaras pen jaŋaşyl täsıldıŋ maŋyzy orasan. Şyǧarmaşylyq oilau, zerektık, jaŋa şeşımder taba bılu – jastarǧa tän qasietter. Sondyqtan sızderge artylar ümıt zor, – dedı Mūrat Tıleuberdiev.
Sonymen bırge forumda tek tyiym men jaza turaly ǧana söz bolǧan joq. Studentterge jastardyŋ türlı daǧdylaryn damytuǧa, jūmys ızdeuge jäne öz bastamalaryn jüzege asyruǧa kömektesetın NextUrpaq, Jas Fund jäne «Özıŋnen basta» jobalary tanystyryldy.
– Mūndai forumdar qajet, öitkenı olar jastar men bilık ökılderı arasynda tıkelei dialog ornatuǧa mümkındık beredı. Bız üşın bır-bırımızdı tyŋdau ǧana emes, jastardyŋ pıkırı şyn mänınde maŋyzdy ekenın tüsınu de qajet. Bız – elımızdıŋ bolaşaǧyn qalyptastyratyn kelesı ūrpaqpyz. Sondyqtan jauapty şeşım qabyldaudy bügınnen bastap üirenuımız kerek. Jastarmen zaŋ, tärtıp jäne jauapkerşılık turaly söilesu asa maŋyzdy. Zaŋ bız ony özımız qūrmettep, saqtaǧan kezde ǧana tolyqqandy jūmys ısteidı, – deidı Qaraǧandy medisina universitetınıŋ studentı Şapaǧat Qūrmanǧazyqyzy.
Forum aiasynda Qaraǧandy ūlttyq universitetınıŋ zaŋ fakultetınde bolaşaq prokuror auditoriiasy aşyldy.
Mūnda «Prokurorlyq qadaǧalau» pänı boiynşa sabaqtar prokuraturanyŋ qazırgı qyzmetkerlerınıŋ qatysuymen ötedı.
Forum aşyq ärı interaktivtı formatta ūiymdastyryldy. Studentter türlı oiyndarǧa, aşyq pıkırtalastar men paneldık kezdesulerge qatysyp, sarapşylarǧa sūraq qoidy, naqty jaǧdailardy talqylap, öz şeşımderın ūsyndy.
Forum barysynda qoǧamdyq ömırge belsendı aralasqany, azamattyq ūstanymy, zaŋ men tärtıp qaǧidattaryn qūrmettegenı üşın bırqatar jasqa oblys äkımı men prokurorynyŋ alǧys hattary tabystaldy.
Sondai-aq balalaryn laiyqty tärbielep, eldıŋ jauapty azamattaryn qalyptastyruǧa üles qosqan ata-analarǧa da alǧys bıldırıldı.
Is-şara «Zaŋ jäne tärtıp» tūjyrymdamasyn ılgerıletu aiasynda ötkızıldı. Forum jastardyŋ qūqyqtyq mädenietın arttyruǧa, qūqyq būzuşylyqtardyŋ aldyn aluǧa jäne qabyldaityn şeşımderıne jauapkerşılıkpen qarau daǧdysyn qalyptastyruǧa baǧyttaldy.
