قاراعاندى وبلىسىنىڭ 15 مىڭ ستۋدەنتى «جاستار – زاڭ مەن ءتارتىپتىڭ تىرەگى» فورۋمىنا قاتىستى. ولارعا ەسىرتكى ساۋداسىنان، ينتەرنەت-الاياقتىقتان جانە دروپپەرلىكتەن اقشا تاپپاق بولعان ءوز قۇرداستارىنىڭ قىلمىستىق جاۋاپكەرشىلىككە تارتىلعان ناقتى وقيعالارى كورسەتىلدى. سوڭعى بەس جىلدا قازاقستاندا وسىنداي قىلمىستار جاساعانى ءۇشىن 21 جاسقا تولماعان 800 ادام سوتتالعان.
فورۋمنىڭ باستى تاقىرىپتارىنىڭ ءبىرى – قابىلداعان شەشىمدەرى ءۇشىن جاۋاپكەرشىلىك. سونىمەن قاتار ستۋدەنتتەرگە قۇقىقتىق ساۋاتتىلىقتى ارتتىرۋ، ەسىرتكى قىلمىستارىنىڭ، الاياقتىق پەن كيبەرقىلمىستىڭ الدىن الۋ ماسەلەلەرى ءتۇسىندىرىلدى.
قاراعاندى وبلىسىنىڭ اكىمى ەرماعانبەت بولەكپاەۆ جاستاردىڭ قۇقىقتىق ساناسىن قالىپتاستىرۋدىڭ ماڭىزدىلىعىنا توقتالدى.
– بۇگىندە جاستاردىڭ كوزقاراسى مەن مىنەز-قۇلقىنىڭ قالىپتاسۋىنا تسيفرلىق ورتا، اسىرەسە الەۋمەتتىك جەلىلەر بارعان سايىن كوبىرەك ىقپال ەتىپ كەلەدى. بۇعان جاسوسپىرىمدەر ايرىقشا بەيىم: تەز اقشا تابۋعا دەگەن ۇمتىلىس كەيدە ولاردى ورەسكەل قاتەلىكتەرگە، ءتىپتى قىلمىسقا دەيىن جەتەلەيدى. سوندىقتان مەملەكەت باسشىسى اتاپ وتكەندەي، ءبىزدىڭ مىندەتىمىز – جاس ۇرپاقپەن جاۋاپكەرشىلىك، ادالدىق جانە زاڭدى قۇرمەتتەۋ تۋرالى ولار تۇسىنەتىن تىلدە ءارى زاماناۋي فورماتتا سويلەسۋ، – دەدى ەرماعانبەت بولەكپاەۆ.
قىلمىستىڭ ينتەرنەت كەڭىستىگىنە بارعان سايىن بەلسەندى تۇردە اۋىسۋى تۋرالى وبلىس پروكۋرورى مۇرات تىلەۋبەرديەۆ تە ايتتى. ونىڭ سوزىنشە، قۇقىق قورعاۋ ورگاندارىنا مۇنداي قىلمىستارمەن كۇرەسۋدىڭ جاڭا تاسىلدەرىن مەڭگەرىپ، جۇمىس ادىستەرىن جەتىلدىرۋگە تۋرا كەلەدى. ال جاس ماماندار بۇل ىسكە تىڭ يدەيالار مەن جاڭا كوزقاراس اكەلە الادى.
– قىلمىستىق ورتا عىلىمي-تەحنيكالىق پروگرەستىڭ جەتىستىكتەرىن ءوز ماقساتىنا پايدالانىپ وتىر. الاياقتىق جاساۋ، ەسىرتكى ساتۋ سياقتى قىلمىستار ينتەرنەت كەڭىستىگىنە اۋىستى. قۇقىق قورعاۋ ورگاندارى ءوز جۇمىسىن قايتا قاراپ، قىلمىستاردى اشۋدىڭ جاڭا ادىستەرىن ازىرلەپ جاتىر. بۇل رەتتە تىڭ كوزقاراس پەن جاڭاشىل ءتاسىلدىڭ ماڭىزى وراسان. شىعارماشىلىق ويلاۋ، زەرەكتىك، جاڭا شەشىمدەر تابا ءبىلۋ – جاستارعا ءتان قاسيەتتەر. سوندىقتان سىزدەرگە ارتىلار ءۇمىت زور، – دەدى مۇرات تىلەۋبەرديەۆ.
سونىمەن بىرگە فورۋمدا تەك تىيىم مەن جازا تۋرالى عانا ءسوز بولعان جوق. ستۋدەنتتەرگە جاستاردىڭ ءتۇرلى داعدىلارىن دامىتۋعا، جۇمىس ىزدەۋگە جانە ءوز باستامالارىن جۇزەگە اسىرۋعا كومەكتەسەتىن NextUrpaq, Jas Fund جانە «وزىڭنەن باستا» جوبالارى تانىستىرىلدى.
– مۇنداي فورۋمدار قاجەت، ويتكەنى ولار جاستار مەن بيلىك وكىلدەرى اراسىندا تىكەلەي ديالوگ ورناتۋعا مۇمكىندىك بەرەدى. ءبىز ءۇشىن ءبىر-ءبىرىمىزدى تىڭداۋ عانا ەمەس، جاستاردىڭ پىكىرى شىن مانىندە ماڭىزدى ەكەنىن ءتۇسىنۋ دە قاجەت. ءبىز – ەلىمىزدىڭ بولاشاعىن قالىپتاستىراتىن كەلەسى ۇرپاقپىز. سوندىقتان جاۋاپتى شەشىم قابىلداۋدى بۇگىننەن باستاپ ۇيرەنۋىمىز كەرەك. جاستارمەن زاڭ، ءتارتىپ جانە جاۋاپكەرشىلىك تۋرالى سويلەسۋ اسا ماڭىزدى. زاڭ ءبىز ونى ءوزىمىز قۇرمەتتەپ، ساقتاعان كەزدە عانا تولىققاندى جۇمىس ىستەيدى، – دەيدى قاراعاندى مەديتسينا ۋنيۆەرسيتەتىنىڭ ستۋدەنتى شاپاعات قۇرمانعازىقىزى.
فورۋم اياسىندا قاراعاندى ۇلتتىق ۋنيۆەرسيتەتىنىڭ زاڭ فاكۋلتەتىندە بولاشاق پروكۋرور اۋديتورياسى اشىلدى.
مۇندا «پروكۋرورلىق قاداعالاۋ» ءپانى بويىنشا ساباقتار پروكۋراتۋرانىڭ قازىرگى قىزمەتكەرلەرىنىڭ قاتىسۋىمەن وتەدى.
فورۋم اشىق ءارى ينتەراكتيۆتى فورماتتا ۇيىمداستىرىلدى. ستۋدەنتتەر ءتۇرلى ويىندارعا، اشىق پىكىرتالاستار مەن پانەلدىك كەزدەسۋلەرگە قاتىسىپ، ساراپشىلارعا سۇراق قويدى، ناقتى جاعدايلاردى تالقىلاپ، ءوز شەشىمدەرىن ۇسىندى.
فورۋم بارىسىندا قوعامدىق ومىرگە بەلسەندى ارالاسقانى، ازاماتتىق ۇستانىمى، زاڭ مەن ءتارتىپ قاعيداتتارىن قۇرمەتتەگەنى ءۇشىن بىرقاتار جاسقا وبلىس اكىمى مەن پروكۋرورىنىڭ العىس حاتتارى تابىستالدى.
سونداي-اق بالالارىن لايىقتى تاربيەلەپ، ەلدىڭ جاۋاپتى ازاماتتارىن قالىپتاستىرۋعا ۇلەس قوسقان اتا-انالارعا دا العىس ءبىلدىرىلدى.
ءىس-شارا «زاڭ جانە ءتارتىپ» تۇجىرىمداماسىن ىلگەرىلەتۋ اياسىندا وتكىزىلدى. فورۋم جاستاردىڭ قۇقىقتىق مادەنيەتىن ارتتىرۋعا، قۇقىق بۇزۋشىلىقتاردىڭ الدىن الۋعا جانە قابىلدايتىن شەشىمدەرىنە جاۋاپكەرشىلىكپەن قاراۋ داعدىسىن قالىپتاستىرۋعا باعىتتالدى.
