قاراعاندىدا اۋماعى 200 گەكتاردان اساتىن ەكوپارك قۇرۋ جۇمىستارى جالعاسىپ جاتىر. بۇگىن دۇنيەجۇزىلىك تازالىق كۇنىنە وراي مۇندا «تازا قازاقستان» ەكولوگيالىق باعدارلاماسى اياسىندا تاعى 500 كوشەت وتىرعىزىلدى.
ەكولوگيالىق اكتسياعا ستۋدەنتتەر، ۆولونتەرلەر،
سونداي-اق «تالداۋ مەكتەبىنىڭ» قاتىسۋشىلارى مەن تۇلەكتەرى اتسالىستى.
— ەكولوگيالىق اكتسياعا قالامىزدىڭ تابيعاتىنا بەيجاي قارامايتىن تۇرعىنداردى، ستۋدەنتتەر مەن ۆولونتەرلەردى شاقىردىق. وسىنداي يگى باستامالار ادامداردى ورتاق ىسكە جۇمىلدىرىپ، قالامىزدىڭ جاسىل جەلەگىن كوبەيتىپ، ونى جايلى ءارى كورىكتى ەتۋگە مۇمكىندىك بەرەدى، — دەدى قاراعاندى وبلىسىنىڭ جاستار رەسۋرستىق ورتالىعى ديرەكتورىنىڭ ورىنباسارى اردانا مارزانوۆا. — مۇنداي اكتسيالار قاراعاندىدا عانا ەمەس، وبلىستىڭ وزگە دە قالالارى مەن اۋداندارىندا ءوتىپ جاتىر.
كوشەت ەگۋ شاراسىنا قاراعاندى وبلىسىنىڭ اكىمى ەرماعانبەت بولەكپاەۆ پەن قوعام قايراتكەرى ماۋلەن اشىمباەۆ تا قاتىستى.
— «تازا قازاقستان» — مەملەكەت باسشىسىنىڭ اسا ماڭىزدى باستامالارىنىڭ ءبىرى. بەس جىلدان كەيىن وسى جەرگە قايتا كەلگەنىمىزدە، مۇندا تۇتاس ءبىر ورمان بوي كوتەرەدى. سول كەزدە وسى ساياباقتىڭ ىرگەسىن قالاۋعا ءوز ۇلەسىمىزدى قوسقانىمىزدى ماقتانىشپەن ايتاتىن بولامىز، - دەدى ماۋلەن اشىمباەۆ.
IT-بيزنەس كوللەدجىنىڭ ستۋدەنتى ماكسيم فەدكەۆيچ ءۇشىن بۇل اكتسيا اعاش وتىرعىزۋعا العاش رەت قاتىسۋىمەن ەرەكشەلەندى.
— بۇل — ءوز قولىممەن وتىرعىزعان العاشقى اعاشىم. سوندىقتان مەن ءۇشىن ونىڭ ورنى ەرەكشە. بۇگىن ءبىز قالامىزدىڭ كوركەيىپ، اباتتانۋىنا عانا ەمەس، ونىڭ بولاشاعىنا دا ءوز ۇلەسىمىزدى قوسىپ جاتىرمىز. جاستار وسىنداي يگى باستامالاردان شەت قالماي، بەلسەندى ارالاسۋى كەرەك دەپ ويلايمىن. ويتكەنى بۇل قالادا ءومىر ءسۇرىپ، ونى ودان ءارى دامىتۋ — ءبىزدىڭ ەنشىمىزدەگى مىندەت. ۋاقىت وتە كەلە بۇل ساياباق قالا تۇرعىندارى سەرۋەندەپ، تىنىعاتىن جاسىل ءارى جايلى مەكەنگە اينالاتىنىنا سەنىمدىمىن، — دەيدى ماكسيم فەدكەۆيچ.
ەكوپارك قۇرۋ جۇمىستارى بيىل مامىر ايىندا باستالعان.
سول كەزدە ونىڭ اۋماعىنا ەمەن، الما، قاراعاي جانە قاراعاشتىڭ 4 مىڭ كوشەتى وتىرعىزىلدى.
سونداي-اق مۇندا «تازا قازاقستان» دەگەن جازۋى بار سيمۆوليكالىق تاس قويىلدى.
قازىر وتىرعىزىلعان اعاشتاردىڭ باسىم بولىگى جەرسىنىپ، تامىر جايدى.
ولاردى تۇراقتى سۋارۋ ءۇشىن اۋماقتا تامشىلاتىپ سۋارۋ جۇيەسى ورناتىلدى.
ەكوپاركتى اباتتاندىرۋ جانە كوگالداندىرۋ جۇمىستارى جالعاسىپ جاتىر.
