تالدى اۋىلىنىڭ ۋچاسكەلىك ينسپەكتورى قوعامدىق ءتارتىپتى قامتاماسىز ەتۋمەن قاتار، اۋىل جاستارىن سپورتقا باۋليتىن زال اشتى
ءتۇتىنى ءتۇزۋ ۇشقان تالدى اۋىلىنىڭ تاريحى سوناۋ 1968 جىلدان باستاۋ الادى. بۇگىندە مۇندا 500-دەن استام تۇرعىن تاتۋ-ءتاتتى عۇمىر كەشىپ، نەگىزىنەن مال شارۋاشىلىعى مەن ەگىنشىلىكتى كاسىپ ەتىپ وتىر. اۋىلداعى قوعامدىق قاۋىپسىزدىكتى قامتاماسىز ەتىپ، تۇرعىنداردىڭ تىنىشتىعىن كۇزەتىپ جۇرگەندەردىڭ ءبىرى – شەت اۋداندىق پوليتسيا ءبولىمىنىڭ ۋچاسكەلىك پوليتسيا ينسپەكتورى، پوليتسيا كاپيتانى مۇحامەدقالي سادۋاقاسوۆ.
بۇل قىزمەت وعان جاي عانا جۇمىس ەمەس. ويتكەنى تالدى – ونىڭ كىندىك قانى تامعان تۋعان جەرى.
مۇحامەدقالي سادۋاقاسوۆ ىشكى ىستەر ورگاندارىنداعى ەڭبەك جولىن 2012 جىلى جىلدام قيمىلدايتىن ارنايى جاساق بولىمىنەن باستاعان. بيىل ناۋرىز ايىنان باستاپ تۋعان اۋىلىنا ۋچاسكەلىك پوليتسيا ينسپەكتورى بولىپ ورالىپ، ەل تىنىشتىعىن قامتاماسىز ەتۋ ىسىنە بىلەك سىبانا كىرىستى.
تۋعان جەرگە تۋىن تىككەن ءتارتىپ ساقشىسى ەڭ الدىمەن اۋىلدىڭ احۋالىن زەردەلەپ، جەرگىلىكتى بيلىك وكىلدەرى جانە اۋىل اقساقالدارىمەن بىرلەسىپ، قوعامدىق ءتارتىپتى نىعايتۋعا باعىتتالعان جۇمىستاردى قولعا الدى.
– اۋىلدىق جەردەگى باستى ماسەلەلەردىڭ ءبىرى – مال ۇرلىعىنىڭ الدىن الۋ. وسى باعىتتا جەرگىلىكتى اتقارۋشى بيلىك وكىلدەرىمەن بىرقاتار جۇمىستار اتقاردىق. قازىرگى تاڭدا بۇل باعىتتاعى جۇمىس جولعا قويىلدى. سونىمەن قاتار اۋىل تۇرعىندارىنىڭ اۋىزبىرشىلىگىنىڭ ارقاسىندا تالدى ىشىمدىكسىز اۋىل اتاندى، – دەيدى ۋچاسكەلىك پوليتسيا ينسپەكتورى مۇحامەدقالي سادۋاقاسوۆ.
پوليتسيا كاپيتانىنىڭ ايتۋىنشا، اۋىلداعى ءتارتىپتىڭ ساقتالۋى تەك قۇقىق بۇزۋشىلىقتىڭ الدىن الۋمەن شەكتەلمەيدى. اسىرەسە جاستاردىڭ بوس ۋاقىتىن ءتيىمدى ۇيىمداستىرۋ – قاۋىپسىز قوعام قالىپتاستىرۋدىڭ ماڭىزدى تەتىگى.
وسىنى ەسكەرگەن ۋچاسكەلىك ينسپەكتور تالدى اۋىلدىق وكرۋگىنىڭ اكىمىنە ۇسىنىس ايتىپ، بوس تۇرعان ءۇيدى جاستاردىڭ سپورتپەن شۇعىلدانۋىنا ارنالعان جاتتىعۋ زالىنا اينالدىرۋدى قولعا العان.
ءوزى جاۋىنگەرلىك سامبودان سپورت شەبەرى بولعان مۇحامەدقالي سادۋاقاسوۆ ەندى جيناعان تاجىريبەسىن اۋىل بالالارىنا ۇيرەتۋدى ماقسات ەتىپ وتىر.
– ءوزىم جاۋىنگەرلىك سامبودان سپورت شەبەرىمىن. سوندىقتان بىلگەنىمدى جاستارعا ۇيرەتىپ، ولاردىڭ بوس ۋاقىتىن ءتيىمدى وتكىزۋىنە مۇمكىندىك جاساعىم كەلدى. بالا تاربيەسىنە ارنالعان سپورت زالىن اشۋ – كوپتەن بەرگى ارمانىم ەدى. بۇگىندە سول ارمانىمدى جۇزەگە اسىرىپ جاتىرمىن. الداعى ۋاقىتتا وسى جەردەن ەلدىڭ تىنىشتىعىن كۇزەتەتىن، زاڭ مەن ءتارتىپتى تۋ ەتەتىن جاستار شىقسا، ەڭبەگىمنىڭ اقتالعانى، – دەيدى ول.
جاڭا سپورت زالدىڭ اشىلۋ سالتاناتىنا قاراعاندى وبلىسى پوليتسيا دەپارتامەنتى مەن اۋداندىق پوليتسيا ءبولىمىنىڭ باسشىلىعى، اۋدان اكىمى، اۋىل اقساقالدارى مەن تۇرعىندار قاتىستى.
تالدى اۋىلدىق وكرۋگىنىڭ اكىمى نۇرلان ابجانوۆ بۇل باستامانىڭ اۋىل جاستارى ءۇشىن ماڭىزى زور ەكەنىن اتاپ ءوتتى.
– وسىدان ەكى-ءۇش اي بۇرىن اۋىلدىڭ ۋچاسكەلىك پوليتسيا ينسپەكتورى مۇحامەدقالي سادۋاقاسوۆ جاستاردى سپورتقا باۋلىپ، ولاردىڭ تالابىن ۇشتايتىن زال قاجەت ەكەنىن ايتىپ، ۇسىنىس ءبىلدىردى. ءبىز بۇل باستامانى قولدادىق. بۇگىن سول جۇمىستىڭ ناتيجەسىندە سپورت زالىن اشىپ وتىرمىز. بۇل – پوليتسيا تاراپىنان بالالاردىڭ بولاشاعىنا كورسەتىلگەن ۇلكەن قولداۋ. وسى باستامانى جۇزەگە اسىرۋعا اتسالىسقان پوليتسيا ءبولىمىنىڭ باسشىلىعىنا جانە پوليتسيا دەپارتامەنتىنە العىسىمدى بىلدىرەمىن، – دەدى اۋىل اكىمى.
قىزمەت بابىندا ءجۇرىپ، تالاي بايراقتى باسەكەدە توپ جارعان ءتارتىپ ساقشىسىنىڭ ەندىگى ماقساتى – ءوزى اشقان سپورت زالىندا جاتتىققان ءار بالانىڭ بيىكتەن كورىنۋى.
ال جاڭا زالدىڭ اشىلۋىنا كۋا بولعان اۋىل جاستارىنىڭ جۇزىنەن قۋانىش پەن ءۇمىت بايقالدى.
– اۋىلىمىزعا مۇحامەدقالي اعامىز قىزمەت بابىمەن اۋىسىپ كەلگەلى بەرى تالدى ىشىمدىكسىز اۋىل اتاندى. بۇگىن جاستارعا ارنالعان سپورت زالدىڭ اشىلىپ جاتقانىنا دا قۋانىپ وتىرمىز. وسىنداي باستامامەن اۋىلىمىزعا ەڭبەك ەتەتىن ازاماتتار كوپ بولسا ەكەن، – دەيدى اۋىل تۇرعىنى ايدار قاميەۆ.
تۋعان جەرىنە قىزمەت ەتۋ – ەلگە قىزمەت ەتۋدىڭ ەڭ بيىك ۇلگىسى. ال قوعامدىق ءتارتىپتى قامتاماسىز ەتۋدى جاستاردىڭ تاربيەسىمەن ۇشتاستىرعان مۇحامەدقالي سادۋاقاسوۆ ءۇشىن پوليتسەيلىك مىندەت پەن ازاماتتىق پارىزدىڭ تۇيىسەر تۇسى دا وسى.
