قاراعاندى وبلىسىندا وتكەن «تازارۋ كۇنى» ەكولوگيالىق اكتسياسىنا 10 مىڭنان استام تۇرعىن بەلسەنە قاتىسىپ، ناۋرىزناما ونكۇندىگىن مازمۇندى تۇردە قورىتىندىلادى. اۋقىمدى شارا بارىسىندا وڭىردە 1,5 مىڭ گەكتار اۋماق تازارتىلىپ، شامامەن 30 مىڭ توننا قاتتى تۇرمىستىق قالدىق سىرتقا شىعارىلدى.
تازالىق كۇنى «تازا قازاقستان» جالپىۇلتتىق باستاماسى اياسىندا ۇيىمداستىرىلدى. بارلىق قالا مەن اۋدانداردا ەرىكتىلەر، ستۋدەنتتەر، ەڭبەك ۇجىمدارى مەن ەكو-بەلسەندىلەر جۇمىلىپ، تازالىق، جاۋاپكەرشىلىك جانە قورشاعان ورتاعا ۇقىپتى قاراۋ مادەنيەتىن دارىپتەدى.
«تازارۋ كۇنىنە» وراي «تازالىق ەستافەتاسى»، «TazaLike» ەكوفەستيۆالدەرى، سونداي-اق «وزىڭنەن باستا» جاستار اكتسياسى ءوتتى.
قاراعاندى قالاسىندا نۇرسۇلتان نازارباەۆ داڭعىلىنداعى گۇلزاردى تازالاۋعا شامامەن 3 مىڭ ادام قاتىستى.
يگى ىسكە جەرگىلىكتى بيلىك وكىلدەرىمەن قاتار جاستار جانە ەرىكتىلەر ۇيىمدارى دا قولداۋ ءبىلدىردى.
سونىمەن قاتار قالا اۋماعىندا ساياباقتار، گۇلزارلار مەن قوعامدىق كەڭىستىكتەر كەشەندى تۇردە تازارتىلدى.
تەمىرتاۋدا «تازارۋ كۇنى» اكتسياسىنا Qarmet كومپانياسىنىڭ مەتاللۋرگتەرى قاتىسىپ، قالانىڭ ورتالىق ساياباقتارى مەن الاڭدارىن رەتكە كەلتىردى.
شاحتينسك قالاسىندا ەرىكتىلەر قارتتارعا قولداۋ كورسەتۋگە باسىمدىق بەردى: «ارداگەرىم – ارداعىم» اكتسياسى اياسىندا جالعىزباستى زەينەتكەرلەردىڭ اۋلالارى تازارتىلىپ، اباتتاندىرىلدى.
جالپى وبلىس بويىنشا تۇرعىندار اۋلالار مەن قوعامدىق كەڭىستىكتەردە تازالىق جۇمىستارىن بەلسەندى جۇرگىزدى.
سونىمەن قاتار «تازا اۋلا» ەكولوگيالىق چەللەندجى باستاۋ الىپ، ءبىر اي ىشىندە ەڭ ۇلگىلى ءارى اباتتاندىرىلعان اۋلا اۋماقتارى انىقتالاتىن بولادى.
