تەمىرتاۋدا قۇرىلتاي دەپۋتاتتارى ءۇنزيلا شاپاق پەن ۆاديم باسين، مەملەكەتتىك ورگانداردىڭ، قازاقستان حالىق كەڭەسىنىڭ جانە قاراعاندى وبلىسىنىڭ قوعامدىق كەڭەسىنىڭ وكىلدەرى مەتاللۋرگتەرمەن كەزدەستى.
ساپار بارىسىندا دەلەگاتسيا Qarmet اق ءوندىرىس ورىندارىن ارالاپ، كاسىپورىننىڭ جۇمىس بارىسىمەن تانىستى. بۇدان كەيىن وتكەن كەزدەسۋدە مەملەكەت باسشىسى قاسىم-جومارت توقاەۆتىڭ جولداۋىندا بەلگىلەنگەن مىندەتتەر مەن باسىم باعىتتار ءسوز بولدى. اتاپ ايتقاندا، ونەركاسىپتى جاڭعىرتۋ، ەنەرگەتيكا مەن ينفراقۇرىلىمدى دامىتۋ، وتاندىق ءوندىرىستىڭ الەۋەتىن ارتتىرۋ ماسەلەلەرىنە نازار اۋدارىلدى.
جۇزدەسۋ بارىسىندا ءوندىرىس ورىندارىن تەحنولوگيالىق تۇرعىدان جاڭارتۋ جانە مەملەكەت باسشىسى جاريالاعان «حالىقتىق قۇرىلىس» باعدارلاماسىنىڭ ماڭىزى دا كەڭىنەن ءسوز بولدى. ەلىمىزدىڭ بارلىق ءوڭىرىن قامتيتىن بۇل باستاما قۇرىلىس سالاسىن جانداندىرىپ قانا قويماي، وتاندىق ونەركاسىپتىڭ دامۋىنا دا تىڭ سەرپىن بەرۋگە باعىتتالعان.
مەتاللۋرگيا سالاسىندا مول تاجىريبەسى بار قۇرىلتاي دەپۋتاتى ۆاديم باسين ونەركاسىپتى دامىتۋعا قاتىستى مىندەتتەردىڭ ورىندالۋى ءوندىرىستى جاڭعىرتۋ مەن بىلىكتى ماماندار دايارلاۋعا تىكەلەي بايلانىستى ەكەنىن اتاپ ءوتتى.
– بۇگىندە ونەركاسىپ زامان تالابىنا ساي جاڭارىپ، وزىق تەحنولوگيالاردى يگەرىپ، ءوندىرىس تيىمدىلىگىن ارتتىرۋى قاجەت. مەتاللۋرگيا كاسىپورىندارى ءۇشىن بۇل – باسەكەگە قابىلەتتىلىكتى نىعايتۋدىڭ جانە وتاندىق ءوندىرىستىڭ بولاشاعىن قامتاماسىز ەتۋدىڭ ماڭىزدى شارتى. وندىرىستىك قۋاتتاردى جاڭارتۋمەن قاتار، زاماناۋي جابدىقتارمەن جۇمىس ىستەي الاتىن، جاڭا تەحنولوگيالاردى جەتىك مەڭگەرگەن بىلىكتى ماماندار دايارلاۋعا دا باسا ءمان بەرۋ كەرەك، – دەدى ۆاديم باسين.
كەزدەسۋ سوڭىندا جولداۋدا ايقىندالعان باسىمدىقتاردى ءوندىرىس ورىندارىندا جۇزەگە اسىرۋ جولدارى، سونداي-اق مەتاللۋرگيا سالاسىنىڭ الەۋەتىن ارتتىرۋ ءۇشىن الدا اتقارىلۋى ءتيىس جۇمىستار جونىندە پىكىر الماستى.
