22 ناۋرىز كۇنى ورال قالاسىندا كوكتەمنىڭ باستى مەرەكەسى – ناۋرىز كەڭ كولەمدە اتالىپ ءوتتى. تاڭعى ساعاتتاردان باستاپ ورتالىق الاڭدارعا جينالعان تۇرعىندار مەن قالا قوناقتارى ءۇشىن كيىز ۇيلەر تىگىلىپ، جارمەڭكەلەر مەن كونتسەرتتىك الاڭدار ۇيىمداستىرىلدى.
ۇيىمداستىرۋشىلاردىڭ مالىمەتىنشە، مەرەكەلىك شارالارعا 50 مىڭنان استام ادام قاتىستى.
قالا تۇرعىندارى ۇلتتىق تاعامداردان ءدام تاتىپ، قولونەر تۋىندىلارىمەن تانىسىپ، تەاترلاندىرىلعان قويىلىمدار مەن كونتسەرتتىك باعدارلامالاردى تاماشالادى. حالىقتىق بىرلىكتىڭ كورىنىسىن ۇلتتىق ويىندار، التىباقان جانە كوپشىلىك سەرۋەندەر ايشىقتاي ءتۇستى.
تۇرعىندار مەرەكەنىڭ ەرەكشە ماڭىزىن اتاپ ءوتتى.
«ناۋرىز – بۇل جاي عانا مەرەكە ەمەس، بۇل ءبىزدىڭ تامىرىمىز بەن تاريحىمىز. بۇگىن بالالارىمىزدى ەرتىپ كەلىپ، ءداستۇرىمىزدى كورسەتكىمىز كەلدى. وسىنداي كۇندەر كوپ بولسا ەكەن»، – دەيدى قالا تۇرعىنى ايگۇل ساريەۆا.
«ۇيىمداستىرۋ دەڭگەيى جوعارى. ەڭ باستىسى – حالىقتىڭ بىرلىگى مەن كوتەرىڭكى كوڭىل-كۇيى. اسىرەسە ۇلتتىق قۇندىلىقتار مەن سالت-ءداستۇردىڭ جاس ۇرپاققا جەتكىزىلىپ جاتقانى ماڭىزدى»، – دەدى زەينەتكەر قانات ورازوۆ.
سالتاناتتى شارا بارىسىندا وبلىس اكىمى تۇرعىنداردى قۇتتىقتاپ، ناۋرىزدىڭ بىرلىك پەن كەلىسىمنىڭ، ۇرپاقتار ساباقتاستىعىنىڭ سيمۆولى ەكەنىن اتاپ ءوتتى. سونىمەن قاتار، مەرەكە قارساڭىندا 43 وتباسىنىڭ جاڭا باسپاناعا يە بولعانىن ايتىپ، وڭىردەگى الەۋمەتتىك قولداۋ شارالارىنا توقتالدى. بۇدان بولەك، ايماقتىڭ دامۋىنداعى وڭ وزگەرىستەر مەن ينۆەستيتسيالىق بەلسەندىلىكتىڭ ارتقانى دا تىلگە تيەك ەتىلدى.
سونداي-اق، مەملەكەت باسشىسى قاسىم-جومارت توقاەۆ باستاماسىمەن جۇزەگە اسقان «ناۋرىزناما» ونكۇندىگىنە ەرەكشە نازار اۋدارىلدى. ونىڭ اياسىندا وتباسى كۇنىندە ۇزاق جىل بىرگە ءومىر سۇرگەن جۇپتار قۇرمەتتەلىپ، وتباسى قۇندىلىقتارى ناسيحاتتالدى. ۇلتتىق سپورت كۇنىندە «بابالار ىزىمەن» ليگاسىنىڭ جاڭا ماۋسىمى باستالىپ، ءداستۇرلى ويىندار زاماناۋي تەحنولوگيالارمەن ۇشتاستىرىلدى. سونىمەن قاتار كۇن سايىن تەاترلاندىرىلعان قويىلىمدار، قولدانبالى ونەر كورمەلەرى ۇيىمداستىرىلىپ، «Digital Nauryz» اياسىندا تسيفرلاندىرۋ ەلەمەنتتەرى ەنگىزىلدى.
الداعى ۋاقىتتا «تازا قازاقستان» ەكولوگيالىق اكتسياسى اياسىندا سەنبىلىكتەر وتكىزىلىپ، كوگالداندىرۋ جۇمىستارى جالعاسىن تابادى.
