22 nauryz künı Oral qalasynda köktemnıŋ basty merekesı – Nauryz keŋ kölemde atalyp öttı. Taŋǧy saǧattardan bastap ortalyq alaŋdarǧa jinalǧan tūrǧyndar men qala qonaqtary üşın kiız üiler tıgılıp, järmeŋkeler men konserttık alaŋdar ūiymdastyryldy.
Ūiymdastyruşylardyŋ mälımetınşe, merekelık şaralarǧa 50 myŋnan astam adam qatysty.
Qala tūrǧyndary ūlttyq taǧamdardan däm tatyp, qolöner tuyndylarymen tanysyp, teatrlandyrylǧan qoiylymdar men konserttık baǧdarlamalardy tamaşalady. Halyqtyq bırlıktıŋ körınısın ūlttyq oiyndar, altybaqan jäne köpşılık seruender aişyqtai tüstı.
Tūrǧyndar merekenıŋ erekşe maŋyzyn atap öttı.
«Nauryz – būl jai ǧana mereke emes, būl bızdıŋ tamyrymyz ben tarihymyz. Bügın balalarymyzdy ertıp kelıp, dästürımızdı körsetkımız keldı. Osyndai künder köp bolsa eken», – deidı qala tūrǧyny Aigül Sarieva.
«Ūiymdastyru deŋgeiı joǧary. Eŋ bastysy – halyqtyŋ bırlıgı men köterıŋkı köŋıl-küiı. Äsırese ūlttyq qūndylyqtar men salt-dästürdıŋ jas ūrpaqqa jetkızılıp jatqany maŋyzdy», – dedı zeinetker Qanat Orazov.
Saltanatty şara barysynda oblys äkımı tūrǧyndardy qūttyqtap, Nauryzdyŋ bırlık pen kelısımnıŋ, ūrpaqtar sabaqtastyǧynyŋ simvoly ekenın atap öttı. Sonymen qatar, mereke qarsaŋynda 43 otbasynyŋ jaŋa baspanaǧa ie bolǧanyn aityp, öŋırdegı äleumettık qoldau şaralaryna toqtaldy. Būdan bölek, aimaqtyŋ damuyndaǧy oŋ özgerıster men investisiialyq belsendılıktıŋ artqany da tılge tiek etıldı.
Sondai-aq, Memleket basşysy Qasym-Jomart Toqaev bastamasymen jüzege asqan «Nauryznama» onkündıgıne erekşe nazar audaryldy. Onyŋ aiasynda Otbasy künınde ūzaq jyl bırge ömır sürgen jūptar qūrmettelıp, otbasy qūndylyqtary nasihattaldy. Ūlttyq sport künınde «Babalar ızımen» ligasynyŋ jaŋa mausymy bastalyp, dästürlı oiyndar zamanaui tehnologiialarmen ūştastyryldy. Sonymen qatar kün saiyn teatrlandyrylǧan qoiylymdar, qoldanbaly öner körmelerı ūiymdastyrylyp, «Digital Nauryz» aiasynda sifrlandyru elementterı engızıldı.
Aldaǧy uaqytta «Taza Qazaqstan» ekologiialyq aksiiasy aiasynda senbılıkter ötkızılıp, kögaldandyru jūmystary jalǧasyn tabady.
