بالقاشتا بەس قاباتتى ءۇيدىڭ ءبىر بولىگى وپىرىلىپ ءتۇستى. بۇل تۋرالى قالا اكىمدىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
وقيعا 19 اقپان كۇنى ساعات شامامەن 08:10-دا بولعان.
«قارامەندە بي كوشەسى، 10 مەكەنجايىندا ورنالاسقان تۇرعىن ءۇيدىڭ بۇرىن اپاتتى دەپ تانىلىپ، بۇزۋعا جاتقىزىلعان، قازىرگى ۋاقىتتا پايدالانىلمايتىن (تۇرعىن ەمەس) كىرەبەرىسىنىڭ ءبىر بولىگى قۇلادى. اتالعان كىرەبەرىستە ەشكىم تۇرماعان. زارداپ شەككەندەر جوق»،- دەلىنگەن حابارلامادا.
اكىمدىك مالىمەتىنشە، 2025 جىلى كورسەتىلگەن كىرەبەرىس قازاقستان رەسپۋبليكاسىنىڭ زاڭناماسىنا سايكەس جۇرگىزىلگەن تەحنيكالىق قورىتىندى مەن قۇرىلىس ساراپتاماسىنىڭ نەگىزىندە اپاتتى دەپ تانىلعان. 5-كىرەبەرىستىڭ تۇرعىندارى الدىن الا قونىس اۋدارىپ، پاتەرلەرى تۇرۋعا جارامسىز دەپ تانىلعاندىقتان، زاڭدا بەلگىلەنگەن تارتىپپەن تۇرعىن ۇيگە مۇقتاج ازاماتتار رەتىندە ەسەپكە قويىلعان.
الايدا وقيعا ورنىنان تاراعان ۆيدەودا "اپاتتى" ءۇيدىڭ قورشاۋعا الىنباعانى بايقالادى. عيمارات ۇلكەن كوشەنىڭ بويىندا ورنالاسقان.
«قۇلاۋ ساتىندە قازا بولعاندار مەن زارداپ شەككەندەر تىركەلگەن جوق. عيمارات قورشاۋعا الىنىپ، كىرۋگە شەكتەۋ قويىلدى، ينجەنەرلىك كوممۋنيكاتسيالار (ەلەكتر، جىلۋ، سۋ جۇيەلەرى) بەلگىلەنگەن تارتىپپەن اجىراتىلدى. قازىرگى ۋاقىتتا قۇرىلىس جانە ونەركاسىپتىك قاۋىپسىزدىك تالاپتارىن ساقتاي وتىرىپ، 5-كىرەبەرىستى دەمونتاجداۋ جۇمىستارى جۇرگىزىلۋدە.
دەمونتاج جۇمىستارى اياقتالعاننان كەيىن قالعان 4 كىرەبەرىستە قوسىمشا تەحنيكالىق تەكسەرۋ جانە قۇرىلىس ساراپتاماسى جۇرگىزىلەدى. الداعى ۋاقىتتا قالعان كىرەبەرىستەر كونسترۋكتسيالارىن كۇشەيتۋ بويىنشا جۇمىستاردى جۇرگىزۋگە ارنالعان جوبالىق-سمەتالىق قۇجاتتاما بەلگىلەنگەن تارتىپپەن ازىرلەنەتىن بولادى»،-دەپ تولىقتىردى اكىمدىك.
