رەسەيدىڭ يۆانوۆو وبلىسىندا ان-22 اسكەري-تاسىمال ۇشاعىنىڭ قۇلاعانى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
ۆۆس حابارلاۋىنشا، ۇشاق اپاتى ۋۆود سۋ قويماسى ماڭىندا بولعان. ۇشاقتىڭ سىنىقتارى سۋ بەتىنەن تابىلعان.
قۇقىق قورعاۋ ورگاندارىنىڭ دەرەگىنشە، اۋە كەمەسى جوندەۋدەن كەيىن جوسپارلى باقىلاۋ ۇشۋىن ورىنداعان.
ەلدىڭ قورعانىس مينيسترلىگى ان-22 ۇشاعىنىڭ قۇلاعانىن راستاپ وتىر.
ۆەدومستۆونىڭ حابارلاۋىنشا، ۇشاق ادام تۇرمايتىن اۋماققا قۇلاعان. ەكيپاجدىڭ جاعدايىن انىقتاۋ ءۇشىن وقيعا ورنىنا ىزدەستىرۋ-قۇتقارۋ توبى جىبەرىلدى.
دەرەككوزدىڭ حابارلاۋىنشا، اپاتقا ۇشىراعان ان-22 ۇشاعىنىڭ ەكيپاجى الدىن الا مالىمەت بويىنشا امان قالماعان. قۇتقارۋشىلار قازىر ۇشقىشتاردى نەمەسە ولاردىڭ دەنەلەرىن ىزدەۋ جۇمىستارىن جالعاستىرىپ جاتىر.
اپات ورىن العان سۋ قويماسى اۋماعىنان ازىرگە تەك اۋە كەمەسىنىڭ سىنىقتارى عانا تابىلعان. بەلگىلى بولعانداي، ەكيپاج مۇشەلەرى سوڭعى رەت جەرمەن بايلانىسقا ساعات 11:00 شاماسىندا شىققان.
سونىمەن قاتار، وقيعانىڭ سەبەپتەرىن زەرتتەۋ ءۇشىن رەسەي اۋە-عارىش كۇشتەرىنىڭ ارنايى كوميسسياسى جۇمىسقا كىرىسەتىن بولدى.
