«تازا قازاقستان – جارقىن بولاشاق» جاستار ەكولوگيالىق فورۋمى قاراعاندى وبلىسىنىڭ قالالارى مەن اۋداندارىنان كەلگەن ستۋدەنتتەردى، كۋرسانتتاردى، ەكوەرىكتىلەر مەن بەلسەندى تۇرعىنداردى ءبىر ورتاعا جينادى. دوستىق ۇيىنە قورشاعان ورتانى قورعاۋدى كۇندەلىكتى ءومىرىنىڭ اجىراماس بولىگىنە اينالدىرعان ازاماتتار جينالدى.
فورۋم رەسپۋبليكالىق «تازا قازاقستان» باعدارلاماسى اياسىندا ءوتتى.

جيىن باستامانى قولداۋعا ارنالعان جالاۋشالارمەن وتكەن فلەشموبتان باستالىپ، ەكولوگيالىق مادەنيەت، ازاماتتىق جاۋاپكەرشىلىك جانە تۋعان ولكەنى ايالاۋ ماسەلەلەرىنە ارنالدى.
فورۋمعا قاتىسۋشىلارعا قاراعاندى وبلىسى اكىمىنىڭ ورىنباسارى الىبەك الدەنەي ءۇن قاتتى. ول ءوڭىردى اباتتاندىرۋعا ۇلەس قوسىپ جۇرگەن تۇرعىندارعا العىس ايتىپ، تازالىق بىرەۋدىڭ ەسكەرتۋى مەن باقىلاۋىنان ەمەس، ءار ادامنىڭ قورشاعان ورتاعا دەگەن جەكە كوزقاراسىنان باستالاتىنىن اتاپ ءوتتى.
– قازاق تىلىندە «ار» دەگەن ۇعىم بار. ول – ادامنىڭ ۇياتى، نامىسى، ىشكى تورەشىسى. بۇل قاسيەت ەشكىم باقىلاپ تۇرماعان كەزدە دە ادامدى دۇرىس ارەكەت ەتۋگە جەتەلەيدى. اينالامىزداعى تازالىق – ءار ادامنىڭ ىشكى دۇنيەسىنىڭ سىرتقى كورىنىسى. «تازا قازاقستان» باستاماسىنىڭ نەگىزىندە دە وسى قۇندىلىق جاتىر، – دەدى الىبەك الدەنەي.

ونىڭ ايتۋىنشا، ادام بويىنداعى وسىنداي اسىل قاسيەتتەر تۇرعىنداردى ورتاق ىسكە جۇمىلدىرىپ، اۋلالاردى رەتكە كەلتىرۋگە، كىرەبەرىستەردى اباتتاندىرۋعا جانە تۋعان ولكەنىڭ تازالىعىن ساقتاۋعا ءوز ۇلەسىن قوسۋعا ىنتالاندىرادى.

فورۋمنىڭ نەگىزگى شارالارىنىڭ ءبىرى ەكولوگيالىق قوزعالىس بەلسەندىلەرىن ماراپاتتاۋ ءراسىمى بولدى. جەڭىمپازدار ءتورت اتالىم بويىنشا انىقتالدى. ولار – «ۇزدىك ەكوۆولونتەر»، «ۇزدىك ەكوكوماندا»، «ۇزدىك كىرەبەرىس» جانە «ۇزدىك اۋلا».

جيىن قوناقتارىنا جۇلدەلى ورىندارعا يە بولعان اۋلالار مەن كىرەبەرىستەر تۋرالى بەينەروليكتەر كورسەتىلدى. ەكراننان تۇرعىنداردىڭ ءوز كۇشىمەن اينالاسىن كوركەيتىپ، ورتاق كەڭىستىكتى وزگەرتۋگە باعىتتالعان ناقتى باستامالارى مەن ەڭبەگى كورىنىس تاپتى.

«ۇزدىك ەكوبەلسەندى» نوميناتسياسى بويىنشا ەكى جەڭىمپاز انىقتالدى. ولاردىڭ ءبىرى – «قازاقستان تەمىر جولى» كومپانياسى ماگيسترالدىق جەلىسىنىڭ قاراعاندى بولىمشەسىنىڭ جەتەكشى ينجەنەر-تەحنولوگى جۇلدىزاي بايدۇيسەن. ول 18 ەكولوگيالىق اكتسيانىڭ باستاماشىسى بولعان.

سونداي-اق ءبىرىنشى ورىندى تەمىرتاۋ قالاسىنداعى №16 جالپى ءبىلىم بەرەتىن مەكتەپتىڭ حيميا جانە بيولوگيا پاندەرىنىڭ مۇعالىمى ۆۋسال مامەدوۆ يەلەندى. ول 80 ەكولوگيالىق ءىس-شارانىڭ ۇيلەستىرۋشىسى بولعان.


«ۇزدىك ەكوكوماندا» نوميناتسياسىندا قاراعاندى قالاسىنداعى «بىزبەن بىرگە بول» ينتەگراتسيالىق ورتالىعىنىڭ ينكليۋزيۆتى جاساعى، شاحتينسك قالاسىنىڭ «ەكودەسانت» جانە پريوزەرسك قالاسىنىڭ «اسار» كوماندالارى جەڭىمپاز اتاندى.

«ۇزدىك كىرەبەرىس» نوميناتسياسى بويىنشا قاراعاندى قالاسى قۇرىلىسشىلار داڭعىلى، 13-ءۇيدىڭ 4-كىرەبەرىسىندە تۇراتىن تۇرعىندار ۇزدىك دەپ تانىلدى.

ال «ۇزدىك اۋلا» نوميناتسياسىندا شەت اۋدانى اعادىر كەنتىنىڭ №9 شاعىناۋدانىنداعى №19, 20, 21, 22 جانە 23 ۇيلەردىڭ تۇرعىندارى جەڭىمپاز اتاندى.

بايقاۋ جەڭىمپازدارىنا ديپلومدار مەن اقشالاي سەرتيفيكاتتار تابىستالدى.
فورۋم ەكولوگيالىق قوزعالىس بەلسەندىلەرىن ۇلىقتاۋمەن عانا شەكتەلمەي، قورشاعان ورتاعا جاناشىرلىق قاراپايىم ارەكەتتەردەن باستالاتىنىن دا كورسەتتى. تازا اۋلا، جيناقى كىرەبەرىس، سەنبىلىككە قاتىسۋ، جاسىل جەلەككە كۇتىم جاساۋ – مۇنىڭ ءبارى ورتاق تازالىققا قوسىلعان ۇلەس.
