2025 جىلعى 2 تامىزدا شىمكەنت قالاسىندا جالپى قالالىق سەنبىلىك ءوتىپ، وعان 11 مىڭنان استام ادام، ونىڭ ىشىندە 28 جاسقا دەيىنگى 4 مىڭنان استام جاس قاتىستى. قالا كوشەلەرىن تازالاۋعا اۋدان اكىمدىكتەرىنىڭ قىزمەتكەرلەرى، قالالىق باسقارمالار، ەرىكتىلەر، تۇرعىندار مەن قوعام بەلسەندىلەرى شىقتى. 215 ارنايى تەحنيكا جۇمىلدىرىلىپ، 160 توننادان استام قوقىس شىعارىلدى.
سەنبىلىك بارىسىندا:
• 57 شاقىرىم جول جيەگى،
• 43 شاقىرىم جاياۋ جۇرگىنشى جولى،
• 38 شاقىرىم يرريگاتسيالىق ارىق جۇيەسى تازالاندى.
سونداي-اق، وزەن ارنالارى مەن جاعالاۋلارى قوقىستان تازارتىلىپ، ءشوپ شابىلىپ، قۋراعان بۇتالار كەسىلدى.
«مۇنداي شارالاردىڭ باستى ماقساتى – اپتاسىنا ءبىر رەت تازالىق ۇيىمداستىرۋ عانا ەمەس، ادامداردىڭ اينالاعا دەگەن كوزقاراسىن وزگەرتۋ. قوقىس تاستاماۋعا داعدىلاندىرۋ. كۇندەلىكتى ومىردە، كوشەدە، تابيعات اياسىندا تازالىق مادەنيەتىن قالىپتاستىرۋ»، – دەيدى ۇيىمداستىرۋشىلار.
سەنبىلىكتەر «تازا قازاقستان» اكتسياسى اياسىندا وتكىزىلىپ كەلەدى. بۇل اكتسيا ناۋرىز ايىندا باستالىپ، جىل سوڭىنا دەيىن اپتا سايىن جالعاسادى.
ەسكە سالا كەتەيىك، شىمكەنت قالاسىندا 2029 جىلعا دەيىنگى ۇزاق مەرزىمدى جوسپار قابىلدانعان. جوسپار اياسىندا «تازا اۋلا»، «World clean-up» سەكىلدى اقپاراتتىق-اعارتۋشىلىق باستامالار، كوگالداندىرۋ، اباتتاندىرۋ جانە تۇرعىنداردىڭ ەكولوگيالىق مادەنيەتىن قالىپتاستىرۋ باعىتىنداعى تۇراقتى جۇمىستار قاراستىرىلعان.
قالالىق اكىمدىك بارلىق تۇرعىنداردى بەلسەندى اتسالىسۋعا شاقىرادى: تازا شىمكەنت – بارشامىزدىڭ ورتاق جاۋاپكەرشىلىگىمىز.
ۇقساس جاڭالىقتار
